Nga Blendi Gashi
Auditi në Kosovë edhe këtë vit me publikimin e raporteve të rregullta vjetore, të financave në të gjitha institucionet e shtetit, në nivelin lokal dhe atë qendror, pra në ministri, komuna, agjenci të pavarura e institucione tjera, ka gjetur një mal shkeljesh ligjore dhe keqpërdorime të shumta.
Ndër shkeljet më flagrante të bërë në vitin 2016-të, janë lëshimi me qera i tetë lokaleve nga komuna e Prizrenit që shfrytëzohen nga partitë politike dhe organizatat joqeveritare për vetëm 1 euro në muaj, pastaj rritje e numrit të punëtorëve, rritje e pagave dhe mëditjeve pa asnjë bazë ligjore, probleme me inkasimin e borxheve, mosregjistrimi i pasurive, dhe një varg shkeljesh të tjera.
Përkundër këtyre shkeljeve, prokuroria vazhdon të flejë si zakonisht pasi nuk e sheh të udhës të hap raste në institucionet përkatëse kundër individëve të implikuar në këto shkelje të rënda dhe të panumërta ligjore.
Njohësit e çështjeve të drejtësisë përkundër që i cilësojnë raportet voluminoze e me shumë shkelje, thonë se organet ndjekëse duhet të ndjekin përgjegjësit dhe t’i vënë ata para drejtësisë. Sipas tyre, raportet janë publike dhe Prokuroria është dashur të merrej me gjetjen që ato i kanë evidentuar,
Diana Metushi-Krasniqi nga Instituti Demokratik i Kosovës (KDI) thotë se është mëse e vërtetë se raportet e Auditit për
vitin e përmbyllur më 31 dhjetor 2016, flasin për një numër të madh të shkeljeve ligjore.
“Në vitin 2015 ka pasur një marrëveshje ndërmjet Auditit dhe Prokurorisë që këto raporte të merren për bazë nga Prokuroria për fillimin e hetimeve për keqpërdorime dhe krime ekonomike.
Megjithatë, deri më tani, në praktikë nuk shohim se një gjë e tillë është duke ndodhur, dhe kjo ndoshta në mungesë të një definicioni të përgjegjësisë përmes legjislacionit aktual”, thotë Metushi-Krasniqi, për tesheshi.com.
Sipas saj një nga gjetjet e para dhe më të shpeshta në pothuajse të gjitha institucionet është mosadresimi i rekomandimeve nga viti paraprak të Auditit nga institucionet, por shton se kjo vjen si rrjedhojë e mungesës se një legjislacioni për penalizimin dhe sanksionimin e institucioneve në bazë të gjetjeve dhe seriozitetit të shkeljeve ligjore.
“Raportet pasqyrojnë shkelje dhe keqmenaxhime të resurseve publike, respektivisht të parasë të tatimpaguesve, dhe mandati i prokurorise është të hetoj shkeljet ligjore. Kur ato janë të dokumentuara mirë në një raport si ai i auditit, prokuroria do të duhej të fillonte hetimet lidhur së paku, për të gjeturat më të mëdha të publikuara në këto raporte”, thotë Metushi-Krasniqi.
Ehat Miftaraj, nga Instituti i Kosovës për Drejtësi (IKD) thotë se Prokurori i Shtetit me ligj është i obliguar se në çdo rast kur ka indikacione se është kryer një vepër penale, të ndërmarrë veprime për të zbuluar dhe zbardhur lidhur me dyshimet
për kryerjën e veprave penale.
“Përderisa, edhe në vitin 2016, Auditi ka publikuar raportet e saj ku në shumë ministri apo institucione publike ka konstatuar parregullsi dhe dyshime për keqpërdorime, por që Prokurori i Shtetit në këtë aspekt nuk i ka trajtuar me seriozitet të gjeturat e Auditit.
Prokurori i Shtetit tanimë luftimin e korrupsionit e praktikon më shumë përmes deklaratve dhe konferencave të rralla për media për të informuar publikun me numra dhe statistika se si i trajtojnë rastet e korrupsionit, por që mungon vullneti i Prokurorit të Shtetit për një luftë të vërtetë ndaj kësaj dukurie”, thotë Miftaraj, për tesheshi.com.
/tesheshi.com/
