Nga Bashkim Kastrati
Muaji shtator ka qenë i shoqëruar me aksidente të shumta të komunikacionit. Me dhjetëra aksidente kanë ndodhur vetëm këtë muaj, ndërsa disa kanë qenë me pasoja fatale, pra me humbje të jetëve të njerëzve. Nga data 1 deri me 24 shtator 2015, kanë humbur jetën hiq më pak se 19 persona në aksidente të ndryshme të komunikacionit.
Zyra për informim e Policisë së Kosovës ka thënë për tesheshi.com se me njësitë relevante të saj rregullisht kanë ndërmarrë masa konkrete në ngritjen e nivelit të sigurisë në komunikacionin rrugor si në aspektin parandalues dhe veprues.
“Ne kemi zhvilluar një numër të madh të aktiviteteve në funksion të sensibilizimit të qytetarëve dhe vetëdijesimit të tyre lidhur me parandalimin e aksidenteve rrugore, duke filluar nga fushatat vetëdijësuese përmes spoteve të ndryshme televizive, broshurave, komunikatave, apeleve dhe informacioneve për publikun”, thotë zyra e PK-së.
Sipas zyrës për informim, policia gjithashtu, në mënyrë konsistente ka zhvilluar dhe implementuar plane operative policore konkrete, si dhe ka ndërmarr masat e nevojshme ligjore duke përfshirë edhe shqiptimin e gjobave aty ku pjesëmarrësit në komunikacion kanë rënë ndesh me ligjin mbi sigurinë dhe komunikacionin rrugor.
Nëse i referohemi statistikave për periudhën e njëjtë kohore janar-gusht 2014/2015, numri i aksidenteve me fatalitet ka shënuar një rënie duke përfshirë edhe numrin e personave të vdekur si pasojë e aksidenteve në komunikacion. Por shqetësuese mbetet trendi i aksidenteve fatale në muajin shtator të këtij viti.
Për tetë muaj 207 mijë e 913 gjoba
Sipas Policisë së Kosovës, në të shumtën e rasteve është konstatuar se deri te aksidentet kanë quar tejkalimi i shpejtësisë, mos mbajtja e distancës, (pra mos respektimi i dispozitave që dalin nga ligji mbi sigurinë në komunikacionin rrugor), gjithashtu edhe gjendja teknike e automjeteve dhe kushtet e rrugës janë nder faktorët tjerë kontribues.
“Ne apelojmë tek te gjithë pjesëmarrësit në komunikacion që të jenë më të kujdesshëm dhe t’i respektojnë rregullat që dalin nga ligji për komunikacionin rrugor, në mënyrë që t’iu shmangen aksidenteve dhe në këtë mënyrë të kontribuojnë në uljen e numrit të jetëve të humbura në aksidente komunikacioni si shqetësim që preokupon si qytetarët tanë poashtu edhe akterët tjerë përgjegjës të kësaj fushe”, thuhet në përgjigjen e PK-së.
Një ndër mënyrat për t’i parandaluar aksidentet është edhe shqiptimi i gjobave për shoferët që shkelin rregullat e komunikacionit. Në periudhën janar – gusht 2015 Policia e Kosovës ka shqiptuar 207 mijë e 913 gjoba.
Policia e Kosovës thotë se vazhdon të jetë aktive duke përfshirë edhe bashkëpunimin me institucione tjera relevante dhe vetë qytetarët për të ndikuar në ndërmarrjen e veprimeve të nevojshme që ndërlidhën me ngritjen e nivelit të sigurisë së përgjithshme në komunikacion duke përfshirë edhe sanksionet që dalin nga ligjet e aplikueshme në vend.
Ja sa aksidente kanë ndodhur brenda tetë muajve të këtij viti
Në periudhën janar – gusht 2015 kanë ndodhur 11 mijë e 511 aksidente. Nga këto, 60 aksidente fatale, ku si pasojë e tyre ka pasur 68 persona të vdekur. Po në këtë periudhë kohore ka pasur 3 mijë e 385 aksidente me lëndime, më konkretisht nga ky numër i aksidenteve janë lënduar 6 mijë e 880 persona. Ndërsa 7 mijë e 320 aksidente kanë qenë aksidente me dëme. E shqetësuese janë rastet kur ata që kanë shkaktuar aksidentet kanë ikur nga vendi i ngjarjes. Raste të tilla për periudhën e lartcekur kanë qenë 746. /tesheshi.com/
