Nga Blendi Gashi
17 vjet pas çlirimit të vendit dhe 8 vjet nga pavarësia institucionet e Kosovës asnjëherë nuk kanë mundur të shtrijnë kontrollin në pjesën më të ndjeshme të vendit, veriun e Kosovës.
Ndonëse janë kënduar edhe këngë “Jo nuk ndahet Mitrovica”, ky qytet pothuajse është i ndarë, sepse në veri shqiptarëve nuk u lejohet të kthehen në shtëpitë e tyre.
Që veriu i Mitrovicës po humbet ka paralajmëruar së fundmi edhe nënkryetari i kuvendit të Kosovës dhe anëtari i Kryesisë së PDK-së, Xhavit Haliti, i cili ka thënë se po bëhen plane ogurzeza në veriun e Kosovës për spastrimin etnik.
Haliti ju ka rekomanduar institucioneve qeveritare që të veprojnë shpejt derisa nuk është bërë vonë. Ai thotë se duhet intervenim i shpejtë “për t’ua djegë letrat në dorë”, sepse dikur bëhet shumë vonë.
“Unë jam shumë i bindur që ka plane ogurzeza për veriun e Kosovës. S’po them më shumë, por ka plane që duhet t’u digjeshin në dorë atyre që i kanë bërë, por që t’u digjen planet në dorë duhen argumente, duhen të dhënat dhe duhet veprim”, ka paralajmëruar Haliti.
Partitë opozitare dhe analistët thonë se zyrtarët e partive në pushtet janë zgjuar vonë nga gjumi duke kuptuar synimin e Beogradit për ndarjen e Mitrovicës së veriut. Sipas tyre qeveria duhet të veproj e jo të flasë fjalë boshe.
Ahmet Isufi nënkryetar i AAK-së thotë veprimet e Serbisë për rikolonizimin dhe spastrimin e shqiptarëve nga veriu i Mitrovicës kanë filluar qysh herët, që nga fillimi i bisedimeve për normalizimin e marrëdhënieve, gjë sipas tij qeveria e Kosovës është dashur ta kuptoj më herët e jo tani.
“Qeveria e Kosovës dhe dy partite në koalicion qeverisës në vend se të flasin fjalë boshe duhet të veproj dhe të mbrojë Kushtetutën dhe ligjet e vendit”, thotë Isufi, për tesheshi.com.
Nexhmedin Spahiu, analist politik njëherit qytetar nga Mitrovica thotë se ndarja përfundimtare e Mitrovices ka ndodhur që kur kuvendi i Kosoves ka miratuar krijimin e Mitrovicës Veriore.
“Kosova nuk rrezikon të ndahet së jashtmi pos ndonjë rrumcalljeje të kufirit si me Malin e Zi, por rrezikon që ndarja e brendshme të thellohet e të formalizohet”, ka thënë Spahiu, për tesheshi.com.
Njohësi i rrethanave politike në vend, Faik Krasniqi thotë se veriu i Kosovës edhe 17 vite pas çlirimit vazhdon të ngelet jashtë juridiksionit të Republikës së Kosovës dhe se në këtë pjesë vazhdojnë të funskionojnë strukturat paralele.
Krasniqi thotë për tesheshi.com se vizita urgjente e Edita Tahirit në Bruksel për strukturat paralele serbe, tregon qartë se ato struktura janë më të fuqishme seç kanë qenë deri më tash, sepse kanë përkrahje të fuqishme nga shteti i Serbisë, madje këtë mbështetje e bën haptas qeveria e Serbisë, siç ësht ë rasti me ndërtimin e lagjes “Lugina e Diellit”.
“Është vështirë të flasim për integrim të serbëve të veriut, e aq më pak që kjo pjesë e territorit të Kosovës të futet nën juridiksionin e Republikës së Kosovës, përderisa ata mbajnë lidhje dhe mbështeten nga qeveria e Serbisë, me tendencë që shteti serb të jetë prezent në Kosovë, përmes serbëve dhe ministrave e zyrtarëve serbë në qeverinë e Kosovës. E këtë gjë Serbia po tenton ta arrijë përmes krijimit të ‘Zajednicës’ serbe. Një ‘autonomi’’ serbe në Kosovës, me tendencë që pas disa viteve të ndahen përfundimisht nga Kosova!”, thotë Krasniqi, për tesheshi.com.
Portali tesheshi.com gjatë ditës ka tentuar të marrë edhe një qëndrim nga qeveria e Kosovës për çështjen në fjalë, por ka qenë i pamundur kontakti me zyrtarët qeveritarë. /tesheshi.com/
