Shkollat në Los Angeles do të jenë të mbyllura gjatë ditës së sotme, për shkak të disa kërcënimeve të cilësuara si serioze nga ana e policisë. Lajmi është raportuar nga mediat amerikane. Prej atentateve të Parisit më 13 nëntor dhe veçanërisht për shkak të masakrës në San Bernardino, 100 kilometra në perëndim të Los Angeles, ku 14 persona u vranë në një qendër personash me aftësi të kufizuara pasi një çift bashkëshortësh palestinezë hodhën veten në erë, tensioni në SHBA është rritur.
Sondazhet raportojnë se në këtë moment frika është shumë e lartë në të gjithë popullsinë, për shkak të pjesëmarrjes së SHBA-ve në luftën kundër ISIS dhe pas deklaratave të Obamës.
Autoritetet në Los Angeles kanë kthyer në shtëpi të gjithë autobusët që çonin fëmijët në shkollë, për të mbajtur zonat nën kontroll dhe për të shmangur ndonjë tragjedi tjetër të mundshme.
Autoritetet kanë marrë alarmin për bombë në disa shkolla dhe kanë vendosur të pezullojnë mësimin për një kohë të papërcaktuar, raporton Los Angeles Times. “Qëndroni larg ambienteve të shkollave”,- është apeli i lëshuar nga autoritet e qytetit.
Los Angeles Unified School District është distrikti i dytë shkollor më i madh në Shtetet e Bashkuara, me 640 mijë studentë në 900 shkolla në Los Angeles dhe në zona të tjera të Kalifonisë.
“Mendoj se është e rëndësishme të merren masat e nevojshme, duke parë se çfarë ka ndodhur në të shkuarën”,- ka thënë Ramon Cortines, drejtues i distriktit shkollor, në një konferencë për shtyp. “Përpara se kjo ditë të mbarojë, dua që të gjitha shkollat të jenë të mbyllura dhe të inspektohen nga autoritetet, për të qenë të sigurta ditën e nesërme, në mënyrë që të mirëpresim fëmijët dhe stafin”,- shton ai./tesheshi.com/
