Big Ben, simboli i kryeqytetit britanik, Londrës rrezikon të ndalet, ndërsa mekanizmi i orës së famshme ka probleme me akrepat, kurse kulla vuan erozionin e kohës. Duhen 40 milionë euro “kurë” për të mbajtur në këmbë Big Benin.
Tashmë, është i vjetër, ka mbushur plot 156 vjet. Big Ben, një nga simbolet e Londrës së bashku me logon e metrosë, taksitë e zeza dhe autobuzët e kuq dykatësh, mund të bllokohet nga njëri moment në tjetrin. Por në fakt, e gjithë struktura ka nevojë për riparime urgjente. Kulla e Orës, e emërtuar si kulla Elisabeth me rastin e jubileut të diamandtë të mbretëreshës, në korrik 2012, duhet të mbyllet për punime rikonstruksioni.
Edhe pse çdo pesë vjet, akrepat (ai i orës që është i gjatë 2.7 metra dhe ai i minutave 4.3 metra) ndalen për operacione pastrimi dhe mirëmbajtjeje në të katër pjesët, tashmë punimet janë më urgjente dhe më të rëndësishme se kurrë.
Sipas një raporti të komisionit për financat të bashkisë së Londrës, do të duhen 29.2 milionë stërlina apo 39.5 milionë euro për të risjellë orën në kushte perfekte funksionimi dhe për të mundësuar që tingulli i pangatërrueshëm i orës Big Ben të mbizotërojë sërish atmosferën e kryeqytetit britanik. Por, bashkë me këto punime, nevojë për rikonstruksion ka edhe e gjithë kulla e Orës, e jo vetëm mekanizmi që mund të bllokohet në çdo moment. Në kullën Elizabeth janë zbuluar gërryerje të mëdha në pjesët metalike, në çati si dhe defekte të tjera në strukturë.
Projekti i plotë parashikon edhe rinovime. Një qendër vizitorësh që duhet të ndërtohet me një lartësi prej 96 metrash përgjatë kullës, me një ashensor në vend të 334 shkallinave që duhen ngjitur aktualisht për të arritur majën.
Aktualisht, hyrja në kullë është e rezervuar vetëm për qytetarët britanikë. Nëse do të miratohej projekti, punimet do të zgjasnin katër muaj, që është periudha më e gjatë në historinë e Big Ben gjatë së cilës Londra ka mbetur pa tingëllimin e kambanës.
Deri më tani, pauza më e gjatë daton në vitin 1976, me 26 ditë bllokim përgjatë nëntë muajve. Por këtë radhë, punët janë në situatë kritike, nëse nuk ndërhyhet brenda 2 deri në tre vjetësh Big Ben mund të ndalet për një vit të tërë. Raporti i këshillit bashkiak merr në konsideratë edhe skenarin se një gjë e tillë do të dëmtonte reputacionin ndërkombëtar të vendit.
Por, në Britani, shifrat e rikonstruksionit të veprave të tilla janë gjithnjë e më të larta. Të jesh qytet historik e jetëgjatë ka kosto të lartë mirëmbajtjeje.
Për monumente si pallati Westminister, që është edhe godina e parlamentit, do të duheshin plot 7 miliardë euro.
Përktheu: Juli Prifti – /tesheshi.com/
