Edhe pse kryeministri Edi Rama u akuzua nga pjesë brenda mazhorancës, përkatësisht LSI por edhe qarqe të lidhura me të, në momentin kur po negocohej takimi me kreun e opozitës, këto qarqe po sulmojnë ashpër Lulzim Bashën.
Po e akuzojnë për pazar me Ramën, ndërkohë që thuajse është hartuar një draft paraprak bisedimesh.
Dhe pikërisht qarqet që nuk duan një pakt Rama-Basha, po i kërkojnë atij që të mos bëjë një marrëveshje për zgjedhjet, pasi sipas tyre kjo nuk është kauza, por diçka tjjetër. E kush na qenka?!
Nikollë Lesi, i cili njohet si përkrahës i Ilir Metës, shkruan:
“Pas deklaratës të LSI, Edi Rama filloi të sillej nëpër Tiranë për gjetjen e një zgjidhje, pa LSI dhe pa PD. Ndërkohë PDIU dhe Shpëtim Idrizi, të qartë në kauzën e opozitës dhe të ndjeshëm në kërkesat e tyre, si dhe korrekt me ndergjegjen intelektuale e politike, vendosën të thonë hapur se pa opozitën nuk mund të ketë zgjedhje të gjithëpranuara.
Ilir Meta dhe Shpëtim Idrizi rrezikuan interesat e tyre politike për kauzën e PD-së dhe të shoqërisë në përgjithësi, pasi nuk duan që vendi të shkojë në destabilitet dhe rrëmujë të madhe. PS-ja lëvizi sot për të futur në skenë disa “sali-rexhep” të rinjë që të futen në zgjedhje në mënyrë që shkojnë në zgjedhje me 18 qershor pa Opozitën, LSI dhe PDIU. Edhe në një përpjekje për të bindur PDIU, sot, PS-ja dështoi.
Por në skenë u fut një miliarder pranë Edi Ramës dhe Lulzim Bashës. Ai negocoi me dy palët, duke qenë ndërmjetës biznesi pothuaj ia doli në mesditë dhe ofroi në qëndrime PD dhe PS që të krijojnë një qeveri të re “besimi”, e cila do quhet “qeveria e reformës”, por duke përjashtuar LSI dhe PDIU, si “tradhtare” të PS! Pra joshja e çadrës me poste qeveritare vë në dyshim kauzën e saj 47 ditore.
Kjo që po ndodh me çadrën dhe pazarin Basha-Rama-Miliarder është si puna e atij që sapo kaloi lumin i tha tjetrit:”të dhjefsha kalin!…”.
Por dardha e ka bishtin prapa! Në çadër nuk ka qetësi. Po shkon ish-kryeministri për të vendosur rregullat e lojës së pabesisë dhe të prishura nga miliarderi…”
Ndërkaq, një gazetar tjetër që është afër Ilir Metës, madje ka qenë pë periudha të qata kryeredaktor i gazetës Integrimi, Poli Hoxha, ka sulmuar ambasadorin amerikan, Donald Lu në një shkrim shumë të ashpër.
Dhe sulmi është botuar në një portal shumë afër ish-kryeministrit Sali Berisha.
Ja ç’shkruan Poli Hoxha:
“Ndoshta analizat dhe prognozat që i shkojnë në zyrë ambasadorit Lu, nuk flasin për këto sinoptika, ndoshta nuk arrin puna kurrë deri aty që Konsorciumi ti realizojë, por nuk ka “qorr” që tashmë nuk e shikon që ai është në veprim. Jo bosi që lëviz i lirë, as kryeministri që po bën sikur po pret implementimin e Reformës në Drejtësi, por Konsorciumi, zoti ambasador.
Të gjithë kemi besim ashtu si edhe ju, te SPAK dhe Byroja e Hetimit që po e trajtoni vetë, por kam frikë se nëse do të vazhdojë të lejohet fuqizimi i kësaj simbioze Krim-Pushtet që po përmbyll fazën e fundit të planit të saj, do tu duhet fatkeqëisht të merreni realisht me “gjeopolitikë”, duke thirrur për ndihmë CIA-n dhe NATO-n bashkë”. /tesheshi.com/
