Qeveria e re siriane e formuar nga Al Sharaah, një koalicion islam që përmbysi Bashar al-Assad në dhjetor dhe mori pushtetin në Damask pas gati 14 vitesh luftë civile, dominohet nga besnikët e presidentit të përkohshëm.
Qeveria përbëhet nga 23 anëtarë, pa kryeministër dhe ka katër ministra që vijnë nga pakicat e Sirisë, një i krishterë, një druz, një kurd dhe një alavit, edhe pse asnjëri prej tyre nuk ka një portofol të rëndësishëm.
“Nuk do të mund t’i kënaqim të gjithë. Në çdo masë që marrim nuk do të ketë konsensus, është normale, por duhet të arrijmë konsensus sa më shumë”, tha ai. Duke folur gjatë një mitingu në pallatin presidencial, të transmetuar në televizionin sirian pas faljes së Bajramit, festës myslimane që shënon fundin e muajit të agjërimit të Ramazanit, Sharaah tha se rruga drejt pajtimit ishte e gjatë dhe e vështirë, por se vendi “ka të gjitha burimet e nevojshme për t’u rikuperuar”.
Njoftimi i formimit të kabinetit të ri të shtunën erdhi dy javë pas hartimit të një deklarate kushtetuese që i jep atij të gjitha pushtetet në degët legjislative, ekzekutive dhe gjyqësore.
Shumica e anëtarëve të qeverisë se re janë sunitë, një reflektim i peshës së tyre demografike në Siri pas më shumë se 50 vjetësh sundimi të pakicës alavite nën Bashar al-Assad dhe para tij, babait të tij.
Sharaah tha se ministrat u zgjodhën për aftësinë e tyre “pa arsye ideologjike apo politike”.
“Një faqe e re e historisë po shkruhet për Sirinë,” tha ai.
Al Sharaah po përgatitet të nënshkruajë një deklaratë kushtetuese që do të drejtojë tranzicionin në Siri për pesë vjet. /tesheshi.com/
