Presidenti i përkohshëm i Sirisë Ahmed al-Sharaa tha në një intervistë të transmetuar sot se “mijëra” njerëz po i bashkohen “ushtrisë së re siriane” pas përmbysjes së presidentit sirian Bashar al-Assad.
“Unë nuk kam vendosur rekrutim në Siri. Unë preferova rekrutim vullnetar dhe sot mijëra njerëz po i bashkohen ushtrisë së re siriane,” tha al-Sharaa në podcast-in “The Rest is Politics”, të organizuar nga dy britanikë: Alastair Campbell – një ish-gazetar dhe këshilltar aktual strategjik i afërt me laburistët – dhe Rory Stewart – një ish diplomat, akademik dhe politikan.
Autoritetet e reja siriane kanë njoftuar shpërbërjen e ushtrisë së Assad-it dhe të të gjitha grupeve të armatosura të opozitës siriane, duke përfshirë Hayat Tahrir al-Sham (HTS), të cilën e drejtonte al-Sharaa.
Sipas ekspertëve, në vitet e para të luftës në Siri, e cila shpërtheu në vitin 2011, viktimat, dezertimet dhe refuzimi për të shërbyer në ushtri e zvogëluan pothuajse gjysmën e ushtrisë së vendit, e cila fillimisht numëronte rreth 300,000 anëtarë.
Qeveria e Assad-it u mbështet nga Rusia dhe Irani, si dhe nga Hezbollahu i Libanit dhe grupe të tjera pro-iraniane, përpara se ushtria siriane të tërhiqej përballë përparimit të rebelëve nën HTS.
Sipas al-Sharaa, “një numër i madh të rinjsh” u larguan nga Siria nën Assad për t’i shpëtuar rekrutimit. “Shumë ish-oficerë po dezertojnë dhe gradualisht po i bashkohen Ministrisë së re të Mbrojtjes,” shtoi ai.
Autoritetet e reja kanë njoftuar integrimin e grupeve të armatosura në ushtrinë e ardhshme kombëtare siriane. Por në terren, grupet e mbështetura nga Turqia vazhdojnë të përleshen me Forcat Demokratike Siriane (SDF) të mbështetura nga SHBA dhe qeverinë gjysmë autonome kurde në Sirinë verilindore.
Al-Sharaa bëri thirrje edhe një herë për heqjen e sanksioneve ndërkombëtare kundër Sirisë, të cilat, tha ai, i janë vendosur regjimit të Assad-it për “krimet e tij”.
“Tani që kemi çmontuar regjimin dhe burgjet e tij, këto sanksione duhet të hiqen, sepse nuk justifikohen pas rënies së tij”, theksoi ai.
Për të adresuar “sfidat e mëdha të sigurisë”, al-Sharaa kryesisht promovon “zhvillimin ekonomik”.
“Është padyshim ajo në të cilën po fokusohemi tani. Pa rritje ekonomike nuk mund të ketë stabilitet dhe pa stabilitet rrezikojmë të krijojmë një mjedis të favorshëm për kaos dhe pasiguri”, shtoi ai. /tesheshi.com/
