Media prestigjoze, Al Jazeera, i ka kushtuar një artikull përpjekjeve të autoriteteve kosovare, posacërisht atyre të futbollit, për t`u anëtarësuar në UEFA e më pas në FIFA. Në shkrim, ca rreshta i kushtohen dhe pozicionimit diplomatik të disa vendeve, përfshirë dhe kryesoren, Serbinë, të cilat janë pengesë që Kosova të mos arrijë atë që synon: njohjen ndërkombëtare dhe në funksion të kompeticioneve të mëdha sportive. Në vijim mund të lexoni shkrimin e Al Jazeera-s:
Këtë javë Kosova do të jetë duke lëvizur më pranë bashkimit me UEFA-n, dhe një vend në eliminatoret e Kupës së Botës të 2018-ës mund të bëhet një mundësi vitin tjetër.
Anëtarësia në organin qeverisës futbollistik të Europës do t’i lejojë klubet dhe ekipin kombëtar të ish-enklavës serbe të fillojnë të luajnë në aktivitetet europiane.
Ky është hapi i parë i kërkuar përpara fitimit të anëtarësisë në FIFA, pjesë e shtytjes më të gjerë të Kosovës për njohje ndërkombëtare që prej deklarimit të pavarësisë nga Serbia në vitin 2008.
Komiteti ekzekutiv i UEFA-s mund të vendosë kur të hapë një sesion dyditor të enjten në Maltë që republika ballkanike i përmbush kërkesat për të aplikuar.
Anëtarësia e plotë mund të jepet vetëm nga kongresi i përvitshëm i UEFA-s, i cili mblidhet në mars, në Budapest.
“Ne shpresojmë që në mars të jemi anëtarë me të drejta të plota të UEFA-s dhe më pas të FIFA-s, e të kapim kualifikimin,” i tha AP-së sekretari i përgjithshëm i Federatës Kosovare të Futbollit, Eroll Salihu.
Me mbështetjen e shpejtë nga FIFA, Kosova mund të nisë kualifikueset e Kupës së Botës shtatorin e ardhshëm.
209 anëtarët e FIFA-s mund ta lejojnë Kosovën të bashkohet në takimet në Meksiko majin e vitit tjetër, duke lënë kohë për ta vendosur Kosovën në një nga dy grupet kualifikuese europiane që kanë vetëm pesë ekipe, e jo gjashtë.
“Ngaqë ka dy grupe me pesë ekipe, ne shpresojmë të jemi si tërë të tjerët në këtë kualifikim,” tha Salihu.
Megjithatë, FIFA deklaroi se “nuk mund të bënte komente mbi skenarët e mundshëm.”
UEFA po e mbështet tani çështjen e Kosovës pasi u rezistoi përpjekjeve të mëhershme nga FIFA për t’i lënë ekipet e saj të luajnë me kundërshtarë nga vende të tjera.
Presidenti i FIFA-s, Sepp Blatter, njoftoi në maj të vitit 2012 se klubet dhe ekipet kombëtare të Kosovës nuk duhej të pengoheshin të luanin ndeshje miqësore.
Kundërshtimi
Kjo u bllokua shpejt nga presidenti i UEFA-s, Michel Platini, i cili u vu në krah të zyrtarëve serbë dhe citoi një vendim “të pastër politik”.
Rusia, një aleate tradicionale e Serbisë, dhe Spanja, e cila i kundërshton lëvizjet për pavarësi në rajonet e saj, e kanë kundërshtuar gjithashtu diplomacinë e futbollit të Kosovës.
Një zhvillim pozitiv ngjau në janarin e 2014-ës, kur FIFA shpalli që ekipet kosovare mund të luajnë ndeshje ndërkombëtare, përveç kundër ekipeve nga pjesë të tjera të ish-Jugosllavisë.
Si një masë e mëtejshme sigurie, FIFA tha se Kosova “nuk mund të shpalosë simbolet kombëtare (flamujt, stemat, etj.) apo të ekzekutojë himnin kombëtar” në këto ndeshje.
Ekipi kombëtar i Kosovës e bëri më në fund debutimin e vet në marsin e 2014-ës, duke barazuar 0-0 me Haitin në Mitrovicë. /tesheshi.com/
