Alexandre Bissonnette, një student 27-vjeçar, është i akuzuari i vetëm nga policia kanadeze për vrasjen në masë në një xhami në Kebek.
Një i ndaluar tjetër me këtë rast, një person me origjinë marokene, është tani në pozitën e dëshmitarit, ndërkohë që më herët qe pretenduar të ishte pjesë e sulmit.
Nga një rrethinë e Qytetit të Kebekut, i dyshuari studionte për shkenca politike dhe antropologji në Laval University, vetëm tre kilometra larg xhamisë ku kreu vrasjet. I arrestuar në makinën e tij, ai u tha forcave policore se ishte i gatshëm të bashkëpunonte me autoritetet.
I akuzuari për sulmin terrorist kishte shprehur pëlqimin në rrjetet sociale për Donald Trump-in dhe Marine Le Pen-in, drejtuesen e Frontit Nacional në Francë, një organizëm politik i ekstremit të djathtë.
Një zyrtar i grupit të avokatisë Welcome to Refugees ka deklaruar se i dyshuari ishte i njohur për pikëpamjet e tij të ekstremit të djathtë.
Sipas BBC-së, Francois Deschamps ka shkruar në faqen në Facebook të organizatës së mësipërme, “Mësuam me dhimbje dhe zemërim identitetin e terroristit Alexandre Bissonnette, i njohur fatkeqësisht për shumë aktivistë në Kebek për marrjen e qëndrimeve nacionaliste, pro Le Pen-it, në Universitetin Laval dhe në median sociale.”
Më shumë se 50 veta ishin në xhami mbrëmjen e së dielës kur u qëllua ndërsa faleshin. Veç gjashtë viktimave, pati dhe 19 të plagosur, pesë prej të cilëve janë ende në spital e dy prej tyre gjenden në gjendje kritike.
“Ky është një sulm terrorist. Këta njerëz u vunë në shenjë vetëm se po praktikonin fenë e tyre,” do të thoshte një ditë më parë Justin Trudeau, kryeministri i Kanadasë. /tesheshi.com/
