Aksi Milot-Balldren që kërkon të ndërtojë qeveria, është shndërruar në kauzë politike nga opozita. Ngjashëm si në rastin e Unazës së re. Nga Kurbini, aty ku qe për një takim mobilizues për protestën e së dielës, kreu demokrat Basha u betua në Kishën e Laçit se nuk do e lejojë ndërtimin e këtij aksi, që sipas tij është një aferë korruptiv.
“Vetëm pak kilometra prej këtej po planifikohet një hajdutëri që ia tejkalon në masa dhe në pacipësi edhe hajnisë kriminale te Unaza e Re, 40 milionë euro për 2 kilometër.
Tani Milot-Balldren, 260 milionë euro për 17 kilometra.
Tani dua t’i them ANK-së dhe atyre që fshihen pas ANK-së, çdo banke shqiptare: mos guxo një lopatë të vetme dheu, sepse dheu do e mbulojë turpin e kësaj afere korruptive.
Kjo kontratë do të varroset. Edi Rama, Belinda Balluku, Damian Gjiknuri, do të shkojnë para drejtësisë.
Zotohem përpara Kishës së Laçit se nuk do i vidhni shqiptarët me këtë kontratë krimi me rrugën Milot-Balldren”, tha Basha.
Por Rama ofroi një tjetër argumentim për këtë investim. Në seancën e paradites në parlament, ai mbrojti koston e ndërtimit të këtij aksi, duke iu referuar standarteve të lartë që do ketë.
Milot-Balldren, do jetë dhe aksi i derdhjes së masës turistike kosovare drejt bregdetit të Shëngjinit dhe Velipojës.
“Sot shpërtheu në rrugën e vijimit të përditshëm të deformimit të vërtetave lidhur me dy projekte të lajmëruara kohë më parë dhe që tani i kanë ardhur parlamentit. Dy projekte shumë të rëndësishme për Shqipërinë turistike: rrugët Balldrem-Milot dhe Orikum-Dukat.
“Rruga Milot-Balldrem do jetë një rrugë ku nuk do të bashkëpunojnë automjetet me bagëtitë. Do jetë rrugë e standardit A europian. Do jetë një rrugë që nuk do të pengojë lëvizjen e banorëve por nuk do t’i lejojë ata të futen në aksin kryesor që do të thotë se do ketë dy rrugë të tjera anësore. Akoma më e rëndësishme është se në atë shumë ka 13000 mijë euro për mirëmbajtje.
Rruga që meriton një farë respekti është Rruga e Kombit, por edhe pse akoma nuk ka mbaruar kërkon para. Nuk është se garanton atë që ne e detyruam të bëjmë me vendosjen e pagesave për mirëmbajtjen e saj.
Ndërsa kjo garanton mirëmbajtje për 13 vjet. Shteti paguan vit pas viti. Nuk janë para që jepen menjëherë. Ne duam të bëjmë rrugë më standarde europiane. Rruga Milot- Balldrem ka dy tunele…”, përfundoi Rama. /tesheshi.com/
