Akuzat për lidhje me narkotrafikun janë shndërruar në një lojë ping-pongu mes qeverisë dhe opozitës, ndërsa palët sulmojnë njëra-tjetrën si në një serial televiziv.
Ndërsa Tahiri argumentoi më parë pse nuk qëndrojnë akuzat e opozitës që e lidhin atë me trafikun e lëndëve narkotike në jug të Shqipërisë, PD ka mbajtur të njëjtin qëndrim.
Flamur Noka ka risjellë në vëmendje se Tahiri është i lidhur me bandat e trafikut pasi këtë, sipas tij, e provojnë akuzat e bëra nga një oficer i lartë i policisë, që nga ana e tij, ka vlerësime edhe nga ndërkombëtarët.
“Saimir Tahiri nuk u kishte dhënë atyre thjesht makinën; të gjithë jemi të qartë! Bashkë me makinën personale, u kishte dhënë imunitet, u kishte hapur rrugët, u kishte hapur dyert. Trafikantet me makinen e ministrit bënin ç’të donin dhe kudo ku kalonin vetëm nderoheshin nga punonjësit e policisë”, tha Noka.
Demokratët e akuzojnë ministrin Tahiri edhe për shitje të makinës së tij në të zezë, sipas një pohimi, në fakt të vetë ministrit.
“Bashkëpunon në krim duke u dhënë makinën trafikantëve, pastaj bën deklarime të rreme kur thotë se makinën nuk e paska më në zotërim, por këtë nuk e vërteton dot, sepse po ta vërtetojë, e kap ligji tjetër i fshehjes së pasurisë dhe e evazionit fiskal”, argumenton opozita.
PD duket e vendosur edhe në kërkesën e saj për dorëheqjen e ministrit të Brendshëm, Saimir Tahiri. /tesheshi.com/
