Ish-numri një i botës në tenisin e meshkujve, që dalëngadalë po kthehet në formën e tij më të mirë, 29-vjeçari spanjoll Rafa Nadal i ka kërkuar Federatës Ndërkombëtare të Tenisit (ITF) të bëjë publike pasaportën e tij biologjike.
Ai është akuzuar nga ish-ministrja franceze e sporteve, Roselyne Bachelot, se mungesa e tij në fushë në vitin 2012 ka qenë një mënyrë për të shmangur pezullimin për përdorim të substancave të ndaluara, e jo për shkak të lëndimeve.
“Ju lutem, i bëni publike të dhënat e mia,” i shkruan Nadal drejtuesit të ITF-së, David Haggerty. “Ju lutem, bëjeni publike pasaportën time biologjike, të gjitha të dhënat antidoping rreth meje.”
Nadal ka shkuar dhe më tej, kur një ditë më herët lajmëroi se e kishte paditur ish-ministren franceze.
“Kërkoj të mbroj integritetin dhe imazhin tim si sportist, por gjithashtu vlerat që kam mbrojtur gjatë gjithë karrierës sime,” do të thoshte ai përmes një deklarate.
Nadal ka fituar së fundmi dy turne të njëpasnjëshëm, në përgatitje për Grand Slam-in e Roland Garros-it.
Kurse ish-ministrja franceze, me të cilën tenisti spanjoll ka vendosur të përballet në gjyq, është tërhequr nga politika që kur e la detyrën në vitin 2010, pasi e mbajti postin ministror për tre vite. /tesheshi.com/
