Nga Blendi Gashi
Prej dy ditësh, opinioni kosovar po ka në qendër figurën e hoxhës së njohur, Shefqet Krasniqi, që mban dhe titullin doktor, që kur Prokuroria Speciale ngriti një akuzë të re ndaj tij. Pa iu futur shumë aspektet të imta juridike, që dhe ato janë tentuar të hidhen poshtë nga zëra kompetentë, shumica nuk e ka gëlltitur dot faktin e një loje të ulët me Krasniqin. Kjo ka bërë që edhe shumë zëra publike, veç mbarë komunitetit të besimtarëve, të vihen krah hoxhës së njohur të Prishtinës.
Krasniqi: Jam i pastër…
Ndaj ngritjes së aktakuzës tashmë ka folur edhe hoxha Shefqet Krasniqi, i cili thotë se ndihet i pastër para shoqërisë dhe Zotit dhe se të gjitha ligjërata dhe shkrimet e tij kanë qenë transparente dhe publike, për çka është i gatshëm të ballafaqohet me organet e drejtësisë dhe shprehet i bindur se do dal triumfues.
Ai shprehet se aktakuza i ka shkaktuar shqetësim atij dhe familjes së tij, sikurse dhe rrethit e shoqërisë.
“Nuk ia kemi pasur borxh askujt. Jam i bindur në ndërgjegjen time të pastër dhe jam shumë komod në ndërgjegjen time. Dhe pa asnjë hezitim jam i gatshëm të ballafaqohem me organet e drejtësisë të dal faqebardhë dhe ballëhapur para shoqërisë dhe mbarë xhematit dhe para medieve. Mbi të gjitha, me këtë komoditet, dal edhe para Zotit nesër”, ka thënë Krasniqi për agjencinë “Ekonomia Online”.
Aktakuzë jo profesionale
Siç cekëm dhe më lartë pas ngritjes së akuzës ndaj Krasniqit kanë plasur reagime të fuqishme jo vetëm nga mbështetës të tij por edhe më gjërë duke u bërë që nga e hëna ndër çështjet më të përfolura mediatike dhe jo vetëm.
Deputetë dhe ish-deputetë, ngritjen e aktakuzës ndaj ish-imamit të Prishtinës e shohin më shumë si përpjekje të sistemit të drejtësisë për të mbuluar dështimet dhe për të tërhequr vëmendjen nga tema të nxehta, derisa gazetar shprehen të habitur me Prokurorinë se si e ngrit një aktakuzë duke interpretuar ajetet kuranore.
Deputeti i pavarur, Gëzim Kelmendi, thotë se kjo është një situatë kur njerëzit e mëdhenj si Shefqet Krasniqi bëhen kurban për t’i mbuluar dështimet dhe skandalet e pushtetit.
“Ky rast është mundësi që pushteti aktual të shmang vëmendjen e opinionit nga Demarkacioni dhe nga dështimet e mëdha si mosthemelimi i forcave të armatosura dhe mosliberalizimi i vizave,dhe të aktualizoj dhe senzibilizoj opinionin me figura që kanë ndikim dhe popullaritet në vendin tonë si Prof.dr. Shefqet Krasniqi”, thotë Kelmendi, për tesheshi. com.
Ish-deputeti i partisë së Drejtësisë, Amir Ahmeti, konsideron se aktakuza e ngritur është joprofesionale dhe si e tillë e vë në dyshim seriozitetin e Prokurorisë së shtetit.
Ai thotë se nuk është detyrë e as kompetencë e prokurorisë të ndërhy në vlerësimin e interpretimeve fetare se cili është interpretimi më i drejtë, gjë që sipas tij kjo ndodhë vetëm në Kosovë që me këtë mënyre po i zbehin vlerën edhe më shumë këto skandale drejtësisë.
“Koha e ngritur se aktakuzës dhe përzierja e saj me dy fusha të ndryshme, atë të terrorizmit dhe tjetra e fshehjes së tatimit janë përveç joprofesionale edhe tendencioze. Drejtësia kosovare ka kohë që ka humbur besueshmërinë e qytetarëve të saj. Tani kur Brukseli po kërkon të luftohet korrupsioni dhe kur pritet dita-ditës të ngriten aktakuzat e para nga Gjykata Speciale në Hagë, dikush po don ta destabilizoi sigurinë në vend dhe të tërhjekë vëmendjen e opinionit publik nga problemet reale të vendit”, thotë Ahmeti, për tesheshi. com.
Edhe Buzhala kundër
Ka bërë përshtypje dhe reagimi i gazetarit Berat Buzhala ndaj akuzës së Prokurorisë për Krasniqit, kur dihet pozicioni i tij në të tilla raste. Ai është shprehur se nuk e kupton si i ka lejuar vetes të interpretoi ajetet kuranore kur ka vendosur të ngritur aktakuzën në fjalë.
“Prokuroria e Kosovës, e edhe drejtësia, po don me thanë që religjionet janë të mira, mirëpo ato keqinterpretohen. Ju (prokuroria) nuk jeni aty per me interpretu libra të shenjtë. Pyetja është kjo: A i ka nxitë Shefqeti djemtë për me shku në Siri, a nuk i ka nxitë? Sepse nëse flasim kështu, nëse drejtësia flet me këtë logjikë, atëherë deri nesër ka me dal një instancë e lartë fetare, edhe ka me ju demantu. Prokuroria është aty për me na tregu, nëse udhëheqësit fetar i shkelin ligjet civile, e jo për me na tregu nëse ligjeratat, nëse veprimet e tyre, janë në përputhje me librat e shenjtë. Se çka është terrorizëm, e çka nuk është, duhet me e kqyrë sipas prizmit të Kodit Penal, e jo sipas Kuranit dhe Biblës. Une nime nuk po e kuptoj”, ka shkruar Buzhala në Facebook.
Edhe Orhan Bislimaj, përfaqësues i Bashkësisë Islame në Prizren ka reaguar pas aktakuzës ndaj Krasniqit.
I pyetur nga portali ynë për rastin në fjalë ai ka thënë se për shkak të vijës zyrtare dhe limitit të kompetencave nuk mund të jap ndonjë përgjigje, por se mund të përdorim shkrimin që ka bërë në Facebook..
Ai në këtë postim thotë se drejtësia e Kosovës po mundohet të gjejë gjilpërën e humbur nëpër lëmën e kashtës.
“Secili njeri që punon edhe gabon, edhe hoxhallarët nuk janë imunë ndaj kësaj. Por, kjo far përndjekja kundër imamëve deri në burgosjen e tyre, pak si rahbetsëz. Siç po duket, drejtësia në Kosovë i ka ngatërruar prioritetet.”, ka shkruar ai në Facebook. /tesheshi.com/
