Akuzat e shoqërisë civile: shkelje në shpërndarjen e fondeve nga buxheti i shtetit

Përfaqësues të shoqërisë civile në Kosovë kanë shprehur shqetësim për mënyrën e dhënies së fondeve publike nga buxheti i Kosovës.
Gjatë një diskutimi të organizuar nga Qendra Informative dhe Kulturore e BE-së në Prishtinë (EUICC) në bashkëpunim me CiviKos-in, përfaqësues të shoqërisë civile theksuan mungesën e kritereve dhe procedurat jo transparente të përzgjedhjes së organizatave përfituese, mungesën e mekanizmave të raportimit dhe mbikëqyrjes si dhe mungesën e një mekanizmi që do të siguronte ruajtjen e pavarësisë së veprimit të organizatave të shoqërisë civile që përfitojnë fonde qeveritare.
Drejtoresha ekzekutive e platformës CiviKos, Valdete Idrizi ka thënë se një vit pas krijimit të mekanizmit për zbatimin e strategjisë, ende ka mjaft probleme. Sipas saj, disa ministri vazhdojnë të bëjnë shkelje në ndarjen e fondeve publike, siç tregon edhe raporti i auditimit.
Hajrulla Çeku, drejtor ekzekutiv i organizatës “Ec Ma Ndryshe”, i cili është përqendruar më shumë në fushën e kulturës, ka thënë se ministria e Kulturës, Rinisë dhe Sportit nuk ka kurrfarë baze të shpërndarjes së fondeve.
Sipas tij, kjo ministri ka ndjekur praktikën e ndarjes së fondeve të vogla dhe të barabarta për një numër të madh organizatash, pa kritere për përzgjedhjen e tyre. Çeku tha se në këtë mënyrë ministritë që ndajnë fonde i shfrytëzojnë ato për kontroll të pushtetit politik.
Ai kritikoi po ashtu mënyrën se si qeveria e përkufizon mbështetjen financiare për organizatat e shoqërisë civile, përkatësisht si subvencion, duke theksuar se shoqëria civile nuk ka nevojë për lëmoshë.
Rexhep Vasolli nga ministria e Financave theksoi se po bëhen përpjekje për ndërtimin e një sistemi transparent dhe llogaridhënës për mbështetjen financiare të shoqërisë civile nga buxheti i Kosovës./tesheshi.com/