Deputeti socialist, Taulant Balla reagoi kundrejt fjalimit të Bashës në Kuvend, duke pasur përballë karriken e zbrazur të tij duke qenë se kryedemokrati u largua sapo mbaroi së foluri vetë. Balla e nisi me shprehjen e keqardhjes për atë që e cilësoi degradim të partisë Demokratike. Pastaj i dha të drejtë Jozefina Topallit, që sipas tij, thoshte gjithnjë se Basha di vetëm të gënjejë.
Dhe në fund, e përmbylli duke thënë se Basha nuk ka mësuar gjë tjetër në Holandë veç fjalës kanabis, duke iu referuar akuzave të ashpra që kreu i PD-së artikulon në çdo dalje publike të kohëve të fundit e që lidhen me kanabizimin e vendit dhe kapjen e qeverisë.
“Si mund t’i besojnë edhe ata që e votuan këtë zotëri të bëjnë të njëjtën gjë në zgjedhjet e ardhshme. Ke ndërtuar një rrugë 62 km për 1 mld euro, ndërsa ne po ndërtojmë sot 94 kilometra me 70 milionë euro. Ti je njeri që i je fshehur drejtësisë për abuzime 230 mijë euro. Nga Holanda ke mësuar vetëm fjalën kanabis, nuk arrite të mësosh gjë tjetër”, tha Balla. /tesheshi.com/
