Pak orë pas akuzave të opozitës se qeveria nuk e arreston qëllimisht Klemend Balilin, e njohur ndryshe si “Eskobarin e Ballkanit” ka ardhur edhe reagimi i ministrit të Brendshëm, Saimir Tahiri.
Në një postim të gjatë në facebook ai thotë se Balili është produkt i qeverisë së mëparshme, ndërsa i referohet operacioneve që ka kryer në Lazarat dhe më gjerë.
“Ashtu si gjithë llumin e Lazaratit e të drogës, të krimit të organizuar e të korrupsionit në polici e gjetëm, nuk e sollëm në, po e trashëguam nga ju, edhe Klement Balilin nga ju e kemi peshqesh! Dhe ashtu si kemi pastruar jo pak nga llumi që ju e mblodhët shtresa – shtresa në tetë vjet dhe e shtruat si jorgan pandëshkueshmërie mbi Policinë e Shtetit, ashtu do bëjmë edhe për Klement Balilin”, shkruan Tahiri, teksa i quan përfaqësuesit e opzitës si trimat e Shqup.
Ministri sqaron se për Balilin nuk ka asnjë shpresë shpëtimi.
“Nuk ka asnjë shpresë t’i shpetojë arrestimit sado të fshihet skutave e ferrave të zonës ku ka vendosur t’i bëjë rezistencë forcës së ligjit. Është i mbaruar dhe fundi i tij do të jetë aty ku kanë përfunduar shumë të tjerë përpara tij”, shprehet Tahiri në facebook
Partia Demokratike akuzoi kryeministrin dhe Tahirin se nuk po zbatjnë urdhërin ndërkombëtar për arrestimin e “eskobarit”, të njoftuar prej 8 muajsh./tesheshi.com/
