Partia e Ramush Haradinajt ka reaguar përmes një deklarate pas akuzave që bëri sot deputeti i Vetëvendosjes Frashër Krasniqi duke thënë se kreu i AAK-së po i bie në gjunjë Listës Serbe për t’u marrë votën për formimin e qeverisë.
AAK i quan, deputetët e VV “neokomunistë”, ndërsa këtij subjekti ia kujton se ka deputetë në mesin e tyre të akuzuar për terrorizëm.
“Listën Serbe”, nuk ua sollëm ne! Atë e gjetëm në mesin tuaj, dhe ju neokomunistët e këtij vendi, mos u thirrni në patriotizëm, sepse pa akte patriotike, që juve u kanë munguar gjithmonë, mund të jetë vetëm strehë horrash!
Përfaqësimi i serbëve kosovarë (në rastin kontekst Lista Serbe) në Institucionet e Republikës së Kosovës është kategori kushtetuese, dhe në çdo kombinim ata duhet të jenë pjesë e institucioneve, sepse kështu e keni gatuar vetë”, thuhet në deklaratën e kësaj partie.
Aleanca më tej debatin e sotëm në Kuvend e quan kakarisje dhe një spektakël populizmi i një grupi jo-formal deputetësh, (në mesin e të cilëve edhe njerëz të akuzuar për terrorizëm), e jo debat parlamentar, pasi thotë se nuk mund të ketë debat në një seancë që nuk ka kuorum, madje kur seanca është konstituive, edhe në rast të kuorumit të plotë, nuk parashihet debati.
“Lërini mbledhjet e kthejuni realitetit. Ne po bëjmë të pamundurën që ta zhbllokojmë situatën e krijuar, duke krijuar parakushtet e realizimit të një të drejte kushtetuese, që është zgjedhja e kryetarit të Kuvendit, e që u pëlqeu apo jo deputetëve ‘neokomunistë’, ajo i përket grupimit më të madh politik në vend.
Nuk e konsiderojmë se situata e krijuar mund të marrë zgjidhje, me fjalime propagandistike e kundërkushtetuese në një mbledhje pa kuorum të Kuvendit”, thuhet në deklaratën e AAK-së. /tesheshi.com/
