Rusia u akuzua para Këshillit të Sigurimit të Kombeve të Bashkuara të martën se ka shkaktuar një “krizë globale ushqimore” dhe se i ka vënë njerëzit në rrezik “të urisë” duke filluar luftën në Ukrainë, shportën e bukës së Evropës.
Presidenti rus Vladimir Putin “e nisi këtë luftë. Putini krijoi këtë krizë globale ushqimore. Dhe është ai që mund ta ndalojë atë”, tha Zv/Sekretarja Amerikane e Shtetit Wendy Sherman në një takim të Këshillit të Sigurimit të OKB-së kushtuar situatës humanitare në Ukrainë.
“Përgjegjësia për luftën në Ukrainë – dhe për efektet e luftës në sigurinë globale të ushqimit – qëndron vetëm tek Rusia dhe presidenti Putin,” tha ajo.
Ambasadori francez në OKB Nicolas de Riviere theksoi se “agresioni rus kundër Ukrainës ka rritur rrezikun e urisë në botë” dhe se popullsia e vendeve në zhvillim do të preket së pari.
“Rusia padyshim do të përpiqet të na bindë se sanksionet kundër saj po krijojnë një çekuilibër në situatën globale të sigurisë ushqimore”, shtoi De Riviere.
Mungesa e ushqimit
Ambasadori i Rusisë në OKB, Vasily Nebenzia, tha se turbulenca e mundshme në tregun global të ushqimit u shkaktua nga “histeria e shfrenuar e sanksioneve që Perëndimi ka nisur kundër Rusisë”.
Sherman dhe Drejtori i Programit Botëror të Ushqimit (WFP) David Beasley raportuan se Ukraina dhe Rusia, të cilat janë gjithashtu prodhuesit kryesorë të drithërave, përbëjnë 30 përqind të eksporteve botërore të grurit, 20 përqind të misrit dhe 75 përqind të vajit të lulediellit.
Bashkimi Evropian njoftoi të premten një iniciativë për të zbutur mungesën e ushqimit të shkaktuar nga lufta.
BE dhe Shtetet e Bashkuara duan një angazhim shumëpalësh për të kufizuar eksportin e lëndëve të para bujqësore.
Ndihmës Sekretari i Përgjithshëm i OKB-së për Çështjet Humanitare, Joyce Msuya tha se konflikti në Ukrainë “kërcënon të përkeqësohet në krizat më të mëdha humanitare në botë, si Afganistani, Jemeni dhe Briri i Afrikës”, ku pasiguria ushqimore është tashmë një problem. /tesheshi.com/
