Seanca gjyqësore në ngarkim të Albin Kurtit dhe përfaqësuesve të Vetëvendosjes, që akuzohen për hedhjen e gazit lotsjellës në ambientet e Kuvendit të Kosovës është shtyrë. Shkak është bërë mungesa në seancë e Kurtit dhe të akuzuarës tjetër, Donika Kadaj. Përveç tyre për hedhjen e gazit lotsjellës, akuzohen edhe Albulena Haxhiu dhe Faton Topalli, që kanë qenë të pranishëm në seancë.
Kryetari i trupit gjykues ka kërkuar që Albin Kurti, Donika Kadaj dhe e dëmtuara Flora Brovina, të sillen forcërisht në gjykatë, duke paralajmëruar edhe arrestimin e tyre, nëse nuk do t´i binden urdhërit.
“Është hera e fundit që do të lëshoj urdhër për sjellje me detyrim”, ka thënë gjyqtari Beqir Kalludra.
Në seancë të pranishëm kanë qenë 4 dëshmitarë, deputetët e PDK-së Blerta Deliu Kodra dhe Bekim Haxhiu si dhe dy punëtore të administratës.
Seanca është shtyrë për muajin tetor, por është kundërshtuar nga deputetët e VV-së për shkak të fushatës për zgjedhje lokale. /tesheshi.com/
