Politika maqedonase u trazua këtë të mërkurë kur Prokuroria Speciale shpalli kërkesën për paraburgim për 18 të akuzuar për vepra të ndryshme penale, ish-zyrtare të pushtetit të Gruevskit, përfshirë dhe këtë të fundit. Bëhet fjalë pra për vetë ish-kryeministrin dhe liderin e VMRO-së, dhe të tjerë si vijon: Sasho Mijallkovin, Gordana Jankullovskën, Mile Janakievskin, Martin Protugjerin, Goran Grujovskin, Dragan Pavlloviç Llatasin, Ejup Alimin, Ismet Gurrin e të tjerë. Ata akuzohen për rastet “Titanik”, “Tortura”, “TNT”, “Thesari”, “Tenderi”, “Toplik”, “Tanku”, “Tarifa”, “Tifani”, “Totali”, “Treqind”, “Traektorja”, “Trust”, “Lëndina”, dhe Target.
“Deri më sot, arritëm të ngrejmë gjithë akuzat për të cilat kemi vlerësuar se kemi prova të forta. Kjo në numra paraqet 17 akuza për 18 lëndë kundër 94 personave fizië dhe 7 personave juridikë. Serioziteti dhe volumi i këtyre lëndëve mund të shihet nëpërmjet faktit se bëhet fjalë se keqpërdorime serioze të kapaciteteve të institucioneve si nga ana e individëve ashtu edhe nga grupe të caktuara. Keqpërdorim të pozitës zyrtare por edhe të procedurave ligjore për furnizime publike”, deklaroi kreu i Prokurorisë Speciae , Katica Janeva.
Ka reaguar menjëherë Gruevksi, duke e sulmuar këtë instancë akuze dhe thënë se se nuk është institucion por zyre politike e LSDM-së. “PSP do të jetë pjesë e historisë, nga e cila do të turpërohen një ditë të gjithë ata që e duan këtë shtet. Udhëheqësia e LSDM-së në vazhdimësi ka qenë në kontakt me disa nga prokurorët. Ata tërë kohën tentojnë të vejnë në kurth njëqind persona nga partia jonë”, tha Gruevski. Sipas tij, qëllimi i Speciales është eliminimi i VMRO-së. /tesheshi.com/
