Të paktën 120 fëmijë midis moshës 1 dhe 17 vjeç u vranë nga policia ose sulmuesit e maskuar gjatë luftës antidrogë të vitit 2016 e nisur nga Presidenti i Filipineve Rodrigo Duterte, tha një OJQ me bazë në Gjenevë.
“Eshtë maja e ajsbergut dhe mund të ketë shumë më tepër,” tha Gerald Staberock, sekretari i përgjithshëm i Organizatës Botërore kundër Torturës (OMCT), për një konferencë shtypi.
“Këto janë ekzekutime të drejtpërdrejta të fëmijëve,” shtoi ai.
Duterte ka nisur një fushatë të pamëshirshme kundër trafikut të drogës, e cila inkurajon policinë që të vrasë trafikantët e drogës.
Raporti OMCT dokumenton 122 vrasje të fëmijëve midis korrikut 2016 dhe dhjetorit 2019 në këtë vend aziatik.
Sipas hetimeve të OMCT, gati 40 përqind e fëmijëve u ekzekutuan nga policia, ndërsa më shumë se 60 përqind u vranë nga persona të panjohur, shpesh sulmues të maskuar, disa prej të cilëve ishin në kontakt të drejtpërdrejtë me policinë. Disa fëmijë ishin shënjestra direkte, veçanërisht nëse ata ishin dëshmitarë të vrasjeve të tjera.
Të tjerët u vranë për shkak të shkëmbimeve të identitetit ose kur objektivi i vërtetë nuk u gjet.
Disa vdiqën nga plumbat qorre gjatë operacioneve policore.
OMCT paralajmëron për politikën e filluar nga shteti dhe pandëshkueshmërinë e atyre që janë përgjegjës për vrasjet.
Lufta kundër drogës ka çuar në një rritje të madhe të arrestimeve të të miturve, me qendra të mbingarkuara dhe tortura dhe keqtrajtime të shpeshta, sipas raportit.
OJQ konstaton se shtetrrethimi i lidhur me pandeminë e virusit koronar ka shkaktuar një rritje të arrestimeve.
Organizata i kërkon Këshillit të Kombeve të Bashkuara për të Drejtat e Njeriut, i cili mblidhet nga 30 qershori deri në 20 korrik në Gjenevë, për të krijuar një mekanizëm ndërkombëtar hetimi mbi këtë çështje. /tesheshi.com/
