Kombet e Bashkuara kanë hedhur një akuzë të rëndë ndaj policisë brazialiane, e cila sipas tyre, po përgatitet për të paraqitur imazhin e një qyteti “të pastër” për Rio de Zhaneiron me rastin e Lojërave të ardhshme Olimpike, duke “pastruar” rrugët e metropolit nga fëmijët e rrugës.
Kjo akuzë që vjen nga komiteti për mbrojtjen e fëmijëve në OKB hedh një hije të rëndë mbi autoritetet vendase dhe mbi Olimpiadën që pritet të zhvillohet në qytetet braziliane vitin e ardhshëm.
Sipas komitetit për mbrojtjen e të drejtave të fëmijëve në OKB, policia po vret fëmijë e adoleshentë për “të spastruar” metropolet e vendit, e sidomos Rio De Zhaneiron me rastin e Lojërave Olimpike të vitit 2016.
Në bazë të informacioneve të mbledhura nga mediat, mes të cilave edhe nga e përditshmja Estado de S.Paulo, Komiteti me seli në Gjenevë sapo ka publikuar një raport alarmant mbi kushtet e të rinjve në vendin latinoamerikan. Në raport konstatohet një rritje e madhe e vrasjeve në vitin 2014: 58 mijë e 559 të tilla kundrejt 55 mijë e 878 të regjistruara në vitin 2013.
Për komitetin e Kombeve të Bashkuara, forcat e rendit janë të përfshira direkt në “numrin e shtuar të ekzekutimeve të fëmijëve”, shpesh të shoqëruara edhe me mosdënimin e autorëve të këtyre ngjarjeve. Dhuna ndaj minorenëve është akoma edhe më e dukshme në Rio de Zhaneiro, ku “ekziston një valë spastrimesh” që ka si qëllim paraqitjen përpara botës të një qyteti pa probleme me dhunën në rrugë, në prag të Lojërave Olimpike të vitit 2016.
Kështu ka deklaruar zëvendspresidenti i Komitetit, Renate Winter. Denoncimet për raste të tilla, fakt që vjen në mbështetje të akuzës, shtohen së tepërmi në Brazil me rastin e ngjarjeve të mëdha sportive që janë organizuar në këtë vend.
“Kemi parë episode të ngjashme gjatë Botërorit të 2014-ës dhe tashmë kërkojmë që fenomenit t’i jepet fund menjëherë për të parandaluar përsëritjen e tij me rastin e Lojërave Olimpike”, pohon eksperti i OKB-së, Gehad Madi.
Në të njëjtën gjatësi vale është edhe komenti i konsulentit nga Ekuadori, Sara Oviedo, sipas të cilit masakrat mbi fëmijët në Brazil nuk janë ndonjë gjë e re. “Por kemi informacione konkrete për faktin që tashmë bëhet fjalë për një mënyrë për përmirësimin e imazhit të qyteteve braziliane me qëllim arritjen e zhvillimit të manifestimeve ndërkombëtare në to”, shton eksperti.
Për Kombet e Bashkuara, ekziston një “dhunë e përgjithësuar” nga ana e policisë, sidomos kundër “fëmijëve të rrugës” dhe atyre që jetojnë në barraka. “Jemi seriozisht të shqetësuar”, kanë deklaruar anëtarët e komitetit, që i kërkojnë qeverisë braziliane miratimin e menjëhershëm të ligjeve që ndalojnë arrestimin arbitrar të fëmijëve të rrugës.
Përgjigja e autoriteteve lokale është ajo e dhënies së besimit për organet e sigurisë publike. Nëpërmjet një deklarate, autoritetet thonë se shteti i Rios e ka ulur në mënyrë domethënëse numrin e vrasjeve të fëmijëve dhe adoleshentëve gjatë viteve 2000 dhe 2013. E kjo, sipas tyre, duket qartë po t’i hedhësh një sy hartës më të fundit të dhunës, të publikuar me kërkesë të qeverisë federale./tesheshi.com/
