Partia Demokratike ka paraqitur një dokument ku i bëhet edhe referencë DEA-s amerikane, e ku sipas së cilës vëllai i ministrit të Brendshëm, Fatmir Xhafaj ka dorëzuar një ngarkesë droge, e cila i është dhënë agjentit të infiltruar të DEA-s.
PD ka publikuar një vendim të gjykatës së Leçes që dënon me 7 vjet për trafik droge vëllain e Fatmir Xhafajt.
Sipas PD-së, ai është filmuar teksa merr 1 kg heroinë dhe ia jep një agjenti të DEA-s.
“Me vendim nr 2232, i 2012, i Gjykatës së Lartë të Italisë është rrëzuar kërkesa e Xhafës. duke lënë në fuqi dënimin me 7 vjet burg. Për pasojë ai është i dënuar me vendim gjyqësor të formës së prerë.
Agron Xhafaj është dënuar për pjesëmarrje në grup kriminal për trafik ndërkombëtar mes Europës dhe SHBA-së për drogën. Marrëveshja ishte për shkëmbim të drogës mes grupeve.
Në operacionin e drogës merrte pjesë si i infiltruar një agjent i DEA-s, të cilit iu dërguar 1 kg heroinë që e siguroi Agron Xhafaj”, tha ish-ministri i Drejtësisë Gazmend Bardhi, kreu i zyrës juridike të PD-së.
Sipas tij, “Agron Xhafaj është dënuar për bashkëpunim me persona të tjerë. Për mbajtje, dhënie dhe marrje të drogës ku ai kishte rolin e blerësit të drogës. Dosja posedon përgjime telefonike që zgjatën prej 1 viti e gjysmë”.
Deri tani, ministri Xhafaj nuk i është përgjigjur kësaj akuze. /tesheshi.com/
