Autoritetit Kombëtar i Ushqimit përgjatë 3 ditëve të fundit ka mbyllur 28 thertore. Aksioni ka nisur pas deklaratave të forta të kryeministrit Edi Rama, që bëri një paralajmërim të qartë për inspektorët e AKU-së në lidhje me përmbushjen e detyrave të tyre. Shkak për mbylljen e thertoreve ishte mungesa e kushteve higjeno-sanitare dhe detyrimet tjera të parashikuara në ligj, ndërkohë që subjektet ishin liçensuar më parë.
Drejtoritë rajonale të AKU-së kanë përqëndruar punën e tyre në kontrollin e pikave të therjes, si dhe njësitë e tregtimit të mishit. Si rezultat, nga 29 inspektime të kryera për këtë qëllim, janë mbyllur 28 pika therjeje në të gjithë vendin, ndërsa për një subjekt, është lënë detyra për plotësimin e disa kushteve. Të gjitha rastet e mësipërme të cilat janë mbyllur nuk garantojnë as minimumin e standarteve të parashikuara me ligj.
Në Tiranë janë mbyllur tri pika therjeje, një punishte qoftesh dhe një pikë e tregtimit të mishit, si dhe një është paralajmëruar, 4 pika therjeje në Qarkun Gjirokastër, dy në Berat, dy në Dibër, 1 në Qarkun Elbasan dhe një subjekt është paralajmëruar, 4 në Qarkun Fier, 1 në Qarkun Lezhë, 1 në Qarkun Kukës, 1 në Shkodër, dhe 4 janë mbyllur nga Drejtoria Rajonale e e Qarkut Vlorë etj.
Autoriteti Kombëtar i Ushqimit, garanton se ky nuk është një aksion, por një punë e filluar e cila përfundon vetëm me reformimin e plotë të gjithë zinxhirit të sigurisë ushqimore në vend, cdo tentativë për të rihapur aktivitetet e mbyllura do të ndëshkohet maksimalisht, ndërsa kujton se në sitën e tij do të jenë të gjitha thertoret dhe njësitë e tjera të tregtimit të mishit. /tesheshi.com/
