Një aktore e re shqiptare është zhdukur pa gjurmë në Los Anxhelos të Amerikës dhe policia e këtij qyteti ka kërkuar ndihmë për gjetjen e saj.
Adea Shabani nuk është lajmëruar që prej të premtes së javës së kaluar. Familja dhe miqtë e saj kanë thënë se kjo gjë është e pazakontë për 25-vjeçaren.
Miqtë kanë thënë për ABC7 se shqiptarja nga Maqedonia kishte lënë derën e banesës të hapur, sikur e kishte ndërmend të kthehej pas pak.
Për 25-vjeçaren që tash e dy vjet është në Los Anxhelos për studime në aktrim, kishin filluar të dyshonin për zhdukje në momentin kur mungoi në një ligjëratë të rëndësishme në “Stella Adler Academy of Acting” dhe kur ajo nuk postoi asgjë nëpër rrjetet sociale.
Mesazhin e fundit që e kishte shkruar Shabani ishte për disa qirinj të kuq, por nuk kishte dhënë ndonjë detaj për vendndodhjen e saj, kanë thënë të afërmit e saj.
Shoqëria ka filluar të shpërndajë njoftime për shqiptaren e zhdukur, për të cilën LAPD ka thënë se për herë të fundit është parë në “1700 block of Wilcox Avenue në Hollywood” më 23 shkurt rreth orës 11.
Nëna e Adeas ka angazhuar një hetues privat për të kërkuar vajzën dhe ka udhëtuar nga Maqedonia. /tesheshi.com/
