Aktori Çun Lajçi i dëshpëruar me Ramushin: Kam frikë se do ta votosh Çakorrin e Kullën

Aktori Çun Lajçi ka shprehur zhgënjimin e tij pas koalicionit parazgjedhor PDK-AAK-Nisma, duke thënë se tash ka frikë që edhe Ramush Haradinaj do të votoj pro Demarkacionit me Malin e Zi.
Lajçi në një postim në rrjetin social Facebook shkruan se nuk ia ka pasur borxh dëshpërimin.
“Unë artisti s’ta kam pas borxh dëshpërimin Komandant i Dukagjinit! Të erdha n’Strasbourg me nji strajcë poezi lum miku, dhe plot me mall t’i lexova e pastaj gojarisht ta thash: ‘kthehu me pisha të dhezuna në brina dhishë, me kunorë therrash rreth qafe, dhe ik prej luleve të mbushura grejza’ por nuk e paske pas kuptue!
Tani Çakorrin e Kullën frigohem se do ta votosh edhe Ti, e mua s’me mbetet tjetër veç me ia ba gjamën.
Unë vertetë s’e kuptuekam politikën, por as Ty lum miku.
Ç’krijesë qenka ky soj shqiptari.
A kështu paskan qenë edhe t’parët?
Sa dëshpërim në kët mengjes Maji të vitit marroç 2017!!!”, ka shkruar Lajçi.
Jo vetëm Lajçi por pas ndërtimit të këtij koalicioni kanë plasur pakënaqësitë edhe brenda tre partive, PDK, AAK e NISMA, ku disa zyrtarë janë larguar nga këto parti./tesheshi.com