Një grup i aktivistëve të Evropës është duke planifikuar një marshim të madh nga Berlini për në qytetin sirian të Halepit më vonë këtë muaj, duke bërë thirrje për t’i dhënë fund sulmeve të vazhdueshme ajrore, të cilat kanë marrë jetën e qindra civilëve.
Gazetarja dhe blogerja polake Anna Alboth, iniciatore e idesë, së bashku me kolegët dhe miqtë e saj, tha se ata presin që me qindra pjesëmarrës do t’u bashkangjiten atyre në Berlin, më 26 dhjetor.
Në Halepin lindor, rreth 300mijë civilë janë ngujuar në një rrethim paralizues, të imponuar nga ana e regjimit, për më shumë se tre muaj.
Që nga mesi i nëntorit, më shumë se 758 civilë janë vrarë, dhe 2.500 të tjerë u plagosën në sulmet e regjimit, sipas shifrave të publikuara nga zyrtarët e mbrojtjes civile lokale.
Alboth tha se shumë evropianë kanë filluar ndihen të lodhur me pamundësinë për të bërë diç, ndërkohë që kriza humanitare është duke u thelluar përherë e më shumë në Halep dhe duan të ndërmarrin veprime konkrete.
“Ne jemi vetëm disa europianë ordinerë, të cilët mendojmë se është koha të themi ‘MJAFT’,” tha ajo, duke shtuar se shumë prej tyre nuk duan të qëndrojnë pasiv.
“Ne dëshirojmë t’ju japim njerëzve një shans për të marrë pjesë në lëvizje, për të thënë se çfarë ata mendojnë. Ne duam gjithashtu t’u japim shpresë njerëzve në Halep”, tha ajo.
Aktivistët, të cilët krijuan llogarinë @CivilMarchForAleppo në faqet e mediave sociale javën e kaluar janë duke shpresuar të tubojnë rreth 5,000 njerëz në Berlin me 26 dhjetor, kur ata do të fillojnë marshimin e tyre civil për në Halep.
Alboth theksoi se fushata e tyre nuk është e lidhur me ndonjë parti apo organizatë politike, dhe kjo është një iniciativë e dhjetëra vullnetarëve nga gjithë Evropa.
“Shumica e njerëzve në ekipin tonë organizues janë qytetarë nga vende të ndryshme evropiane. Ne jemi rreth 120 njerëz; shumica prej nesh janë të moshës 30 apo 40 vjeçare. Nuk qëndron asnjë grup pas nesh, “tha ajo.
Alboth theksoi se ata janë të hapur për pjesëmarrje nga të gjithë, përfshirë anëtarët e organizatave politike apo palëve që ndajnë shqetësimet e tyre mbi Sirinë, por do të lejojnë vetëm flamuj të bardhë gjatë marshimit të tyre në Halep.
Aktivistët janë duke planifikuar të ndjekin një rrugë përmes Republikës Çeke, Austri, Slloveni, Kroaci, Serbi, Maqedoni, Greqi dhe Turqi, në Halep./tesheshi.com/
