Hungaria ka zbuluar autobusët që thotë se do të çojnë azilkërkuesit që mbërrijnë në kufirin e saj me Serbinë në Bruksel, duke shkaktuar një reagim të zemëruar nga qeveria belge.
Kërcënimi, i cili u bë fillimisht në gusht, ka marrë përmasa të reja ditët e fundit, pasi u zbuluan autobusët e verdhë të kompanisë së transportit publik, të cilët ishin angazhuar enkas për këtë qëllim.
“BE-ja dëshiron të detyrojë Hungarinë të lejojë të hyjnë ilegalët (emigrantët) që ndalojmë në kufirin jugor të vendit. Epo atëherë! Pasi të jenë vendosur procedurat evropiane, ne do t’u ofrojmë atyre një drejtim falas për në Bruksel. Nëse i do, Brukseli do t’i ketë”, tha zëvendësministri i Brendshëm Bense Retvari.
Hungaria po i përgjigjet në këtë mënyrë gjobës rekord prej 200 milionë eurosh të vendosur në qershor nga Gjykata Evropiane e Drejtësisë për mosrespektim të traktateve ndërkombëtare për të drejtën e azilit. Gjoba shoqërohet me një gjobë prej një milion euro në ditë. Budapesti refuzon të paguajë, duke e quajtur vendimin “të padrejtë” dhe “skandaloz”.
“Kërcënimi është i papranueshëm”, thotë zëvendësministri i Belgjikës për Azilin dhe Emigracionin
Ky kërcënim është i “papranueshëm”, ka reaguar duke thënë edhe zëvendësministrja e Azilit dhe Emigracionit të Belgjikës, Nicole de Moor. “Kjo lloj sjelljeje arrogante është për të ardhur keq dhe kundërproduktive”, ndërsa “minon solidaritetin dhe bashkëpunimin brenda Bashkimit Evropian”, shtoi ajo, duke paralajmëruar se nëse zbatohet do të ishte “një shkelje flagrante e traktateve evropiane dhe ndërkombëtare”.
Ndërkohë, ministri i Jashtëm i vendit, Haja Lahbib, foli për një “sfidë që bie ndesh me detyrimet evropiane”. Siç tha ai, “politika e imigracionit është një sfidë e përbashkët që duhet të përballet me rregull dhe solidaritet nga të gjitha vendet anëtare”. Kryebashkiaku i Brukselit, nga ana e tij, i kërkon kryeministrit belg, Alexander De Crook dhe ministres së Brendshme të vendit, Anneliese Verlinden “të bllokojnë këta autobusë në kufi”. “Deri kur do t’i tolerojmë këto sfida nga një vend që subvencionojmë?”, pyeti Philippe Clos.
I pyetur për këtë çështje, Komisioni Evropian preferoi të mos komentojë, duke theksuar se është mësuar me “deklarata të tilla të zhurmshme në emër të Hungarisë”.
Kryeministri nacionalist hungarez Viktor Orbán, i cili argumenton se “zëvendësimi etnik” po tentohet në vendet e Evropës Perëndimore, kundërshton me forcë pritjen e emigrantëve nga vendet jashtë Evropës. Pas krizës së vitit 2015, ai “fortifikoi” Hungarinë, duke ngritur gardhe në kufi dhe duke deklaruar se dëshiron të “mbrojë Evropën e krishterë”.
Nëse Budapesti nuk i paguan gjobat, Komisioni Evropian mund t’i mbledhë ato duke reduktuar fondet që nuk i ka ndarë ende Hungarisë. Nga fondet evropiane, 19 miliardë euro mbeten ende të “ngrira” për shkelje të parimeve të shtetit ligjor. /tesheshi.com/
