Kreu demokrat Basha tha në një deklaratë për media se as zgjedhje me 30 qershor nuk do ketë e as presidenti nuk shkarkohet dot.
“Dua të them që në fillim dy të vërteta: Nuk do të ketë zgjedhje lokale në 30 qershor. Nuk do të shkarkojë kush Presidentin e Republikës.
Edi Rama po përpiqet të bombardojë opinionin publik me dy përbetime, që ai as nuk i mban dot, dhe as nuk ka interes t’i provojë: Ai po përbetohet se do t’i mbajë zgjedhjet edhe pa dekret presidencial, edhe pa pjesëmarrje politike.
Ai po përbetohet gjithashtu se do të nisë procedurat për shkarkimin e Presidentit. Janë të dyja bllofe dhe zhurmë me qëllim shpërqëndrimin e vëmendjes tuaj”, tha Basha.
Ndërsa duke gjykuar aktin e presidentit, Basha tha se është Gjykata Kushtetuese ajo që vendos, por që….
“Vendimi i Presidentit i shërben opinionit publik. E mbështes atë, por fjala i takon vetëm Gjykatës Kushtetuese. Nuk më takon as mua të gjykoj vendimin e Presidentit, ndonëse e mbështes plotësisht.
Politikisht unë mund të them që zgjedhjet moniste nuk janë zgjedhje.
Politikisht unë mund të them se vendimi kushtetues dhe i përgjegjshëm i Presidentit i shërben njerëzve dhe interesit publik.
Përtej cdo mendimi individual, ka një dhe vetëm një institucion që mund të shprehet: Gjykata Kushtetuese. Këtë Gjykatë e ka shkatërruar me krenari dhe mburrje Edi Rama, sikurse ka shkatërruar edhe Gjykatën e Lartë, dhe ajo sot nuk mund të shprehet“, theksoi Basha. /tesheshi.com/
