Sipas drejtuesit të Observatorit Kombëtar Francez Kundër Islamofobisë, aktet kundër muslimanëve kanë shënuar një rekord gjatë tre muajve të parë të këtij viti.
Abdullah Zekri tha në një njoftim se aktet antimuslimane në Francë u rritën me 500 për qind krahasuar me të njëjtën periudhë të vitit 2011.
Drejtuesi i Observatorit deklaroi se gjatë çerekut të parë të këtij viti pati 222 akte kundër muslimanëve, 56 sulme dhe 166 kërcënime, përkundrejt një totali prej 37 aktesh në 2014-n.
Vetëm gjatë janarit u regjistruan 178 akte të tilla antimuslimane.
Zekriu e lidhi këtë shpërthim të islamofobisë me ngjarjet në 7 janar në zyrat e revistës satirike franceze Charlie Hebdo, e me pengmarrjet në një supermarket dy ditë më vonë.
Më tej ai qartësoi se sulmet ishin ndaj meshkujve dhe femrave, kryesisht në vendet publike dhe në mjetet e transportit, e në ca raste kishin si objektiv gra shtatzëna.
Pjesë e sulmeve kanë qenë dhe vendet e adhurimit, të goditura me armë zjarri e me mjete shpërthyese.
Zyrtari i lartë i organizmit në fjalë i përshkroi thjesht si racizëm aktet e tilla, si mosnjohje të meshkujve dhe femrave që duan të respektohen.
Përpos kësaj, u shpreh ai, e gjitha kjo ndodh pa ndonjën reagim nga politikanët, të cilët në vend të denoncimit përpiqen të gjejnë shfajësime.
Akte të tilla të shtuara islamofobe ka patur kohët e fundit dhe në Gjermani, ku vetëm tre ditë më parë iu vu zjarrri një xhamie në qytetin e Witten-it. /tesheshi.com/
