Aktakuzë ndaj simpatizantit të Listës Serbe për keqpërdorime në zgjedhje

Është ngritur edhe aktakuza e parë për keqpërdorimet në zgjedhjet e mbajtura dje.

Prokuroria Themelore në Pejë, konkretisht departamenti i krimeve të rënda, ka ngritur aktakuzë kundër të pandehurit R.Z. simpatizant i Listës Serbe për vepër penale “Cenimi i përcaktimit të lirë të votuesve” nga neni 213 i Kodit Penal të Republikës së Kosovës.

 
Sipas aktakuzës, i pandehuri më 11 qershor 2017, në shkollën fillore “Janko Jovicevič” në Gorozhdec të Pejës, , duke shfrytëzuar paaftësinë profesionale të votuesve, u ka sugjeruar atyre të votojnë për personat e cekur në fletëvotimet e plotësuara, të cilat i pandehuri i posedonte me kandidatët e caktuar. Atij i janë gjetur 32 fletëvotime, prej të cilave 27 ishin të shënuara me kandidatë të njëjtë.

 
“I pandehuri me këto veprimet ka përmbushur elementet e veprës penale të përshkruar sikur më lart. Prokurori i çështjes me rastin e ngritjes së aktakuzës i ka propozuar Gjykatës kompetente që të pandehurin ta shpall fajtor për veprën penale për të cilën ngarkohet dhe ta dënojë sipas ligjit”, thuhet në aktakuzë./tesheshi.com/