Në një reagim ndaj aktakuzës së ngritur nga Specialja, kreu i PDK-së Kadri Veseli, dyshon në qëllimet e saj për vetë kohën kur bëhet.
“Duke pasur parasysh kohën dhe rrethanat, pak ditë para takimit në Shtëpinë e Bardhë, me të drejtë janë ngritur dyshime se kjo është rastësi. Asnjë prokuror, asnjëherë nuk do të duhej të lejonte që vendimet e tij të udhëhiqen nga motive politike. Me këtë qasje, Prokurori ka paralajmëruar rrugën që ai pretendon ta ndjekë për ta ushtruar të gjithë pushtetin e tij”, ka thënë Veseli, njeriu që bashkë me Thaçin, të akuzuar që të dy, e kanë pështjelluar skenën politike kosovare.
Për vetë akuzat e ngritura, Veseli tha se ato nuk qëndrojnë.
“Dyshimet e ngritura janë plotësisht të pavërteta dhe nuk qëndrojnë. Po ashtu, nuk ka kurrfarë baze për pretendimet për pengim të punës së gjykatës. Dhe është shqetësim i thellë gjuha e tillë e adresimit me të pavërteta”, theksoi Veseli.
Më tej ai shtoi se të njëjtën gjë do të bënte edhe sot, si atëherë nën UÇK, nëse u kërcënohej jeta dhe liria.
“Ne kemi qenë të detyruar që ta mbrojmë veten dhe vendin tonë. Dhe do ta bëjmë sërish. Nëse na imponohet, edhe një herë do të demonstrojmë me fakte se UÇK ka zhvilluar një luftë të ndershme për liri, kundër një prej ushtrive më të fuqishme dhe më agresore në botë, të udhëhequr nga një bandë kriminale serbësh. Jam krenar që kam qenë pjesë e luftës çlirimtare të popullit të Kosovës dhe e mohoj plotësisht çdo përfshirje në ndonjë akt kriminal”, tha Veseli. /tesheshi.com/
