Ka dhënë efektin e parë akuza ndaj Thaçit nga ana e Speciales në Hagë, ardhur në momentin më të paduhur në raport me kontekstin e zhvillimeve në Kosovë.
Ai, presidenti i Kosovës, ka anulluar udhëtimin drejt Uashingtonit, aty ku do ulej me palën serbe nën hyqmin amerikan, pikërisht në Shtëpinë e Bardhë. Kjo u njoftua pikëllueshëm nga i dërguari Grenell, njeriu që e priste atë e Vuçiçin me datë 27 në SHBA.
“Presidenti i Kosovës sapo na ka informuar se ka anuluar udhëtimin e tij në Uashington, D.C pas njoftimit të bërë nga Zyra e Prokurorisë Speciale.
Unë e respektoj vendimin e tij për të mos marrë pjesë në diskutime derisa çështjet ligjore të atyre pretendimeve të zgjidhen”, shkruan Grenell.
Nga ana tjetër, Thaçi ka marrë mbështetje nga rivalë apo kundërshtarë të tij politikë në Prishtinë, siç Haradinaj e Mustafa, por mungon, për momentin, ai i Kurtit.
“Populli shqiptar i Kosovës me të drejtë zhvilloi luftë për liri, pas shtypjes së egër nga regjimet e ndryshme serbe, që zgjati pothuajse një shekull, duke kulmuar me regjimin e Millosheviqit.
Ushtria Çlirimtare e Kosovës ka bërë luftë të pastër, rezultat i së cilës ishte liria dhe themelimi i Republikës së Kosovës.
Ne besojmë në pafajësinë e Presidentit Thaçi, kryetarit Veseli dhe të gjithë bashkëluftetarëve të tjerë”, shkruan Haradinaj.
“Besoj thellë se lufta e UÇK-së ishte dhe do të konfirmohet nga drejtësia ndërkombëtare si luftë e drejtë dhe pastër, se luftëtarët e UÇK-së luftuan për ta mbrojtur popullin e Kosovës nga terrori, likuidimi dhe gjenocidi serb”, shkuan Isa Mustafa.
Bashkë me Thaçin, nën akuzë është dhe partneri i tij më i ngushtë, njeriu që ia la drejtimin e PDK-së, Kadri Veseli. /tesheshi.com/
