Policia ka ekzekutuar një të ri në Tiranë, i cili nuk i është përgjigjur urdhërit për të ndaluar, e për më tepër, sipas versionit policor, edhe ka kërcënuar uniformat blu me send në duke armë.
Ngjarja ndodhi orët e vona në Laprakë.
Në njoftimin policor thuhet:
“Me datë 08.12.2020, rreth orës 01:45, sherbimet e Policisë gjatë patrullimit në rrugën ‘Dritan Hoxha’, kanë konstatuar një shtetas i cili kryente veprime të dyshimta.
Punonjësit e Policisë i kanë bërë thirrje të ndalonte por personi nuk i është bindur urdhërit të Policisë për të ndaluar.
Edhe pas thirrjeve të vazhdueshme të bëra nga ana e Punonjësit të Policisë për të ndaluar përsëri nuk ka ndaluar dhe është larguar me vrap duke i drejtuar punonjësit të policisë një send të fortë në dukje armë zjarri.
I gjendur në këto kushte dhe në mungesë të ndriçimit të plotë, punonjësi i policisë ka qëlluar me armë zjarri dhe për pasojë ka mbetur i plagosur shtetasi K.R. (Klodian Rasha), 25 vjeç i cili ka humbur jetën në spital.
Menjeherë është ngritur Grupi i Posaçëm Hetimor i përbërë nga SHÇBA dhe Policia.
Prokurori ndodhet në vendngjarje dhe po ndjek e monitoron të gjitha veprimet që po kryhen nga Sherbimi për Çështjet e Brendshme dhe Ankesat në MB dhe nga Policia për zbardhjen e rrethanave të ngjarjes.
Punonjësi i policisë shtetasi N.H., është shoqëruar në ambientet e Drejtorisë Vendore të Policisë Tiranë, për veprime të metejshme.
Vijon puna intensive nga grupi hetimor për zbardhjen e dinamikës së ngjarjes”, saktëson deklarata.
Kujtojmë se ky është ndër të rrallat akte kur policia shqiptare qëllon dhe vret, në këto rrethana, pra jo në shkëbim zjarri, një person që s’i bindet saj në kushtet e urdhërit për t’u ndaluar, pasuar nga kërcënimi ndaj saj.
Diçka e tillë të kujton ashpërsinë ligjore të policisë amerikane në të tilla raste. /tesheshi.com/
