Një aksion i policisë në Shëngjin çoi në arrestimin e 4 personave dhe sekuestrimin e një gomoneje, 30 bidonëve të mbushur me benzinë dhe një automjeti Alfa Romeo.
Aksioni u ndërmorr në kuadër të kontrollit në vijën bregdetare për parandalimin e veprimtarisë së trafikut të drogës.
Policia e Durrësit në bashkëpunim me atë të Lezhës, zbuluan tek “Skalierat Veriore” në Shëngjin, automjetin dhe gomonen në breg.
Eektivet e policisë kanë ndërhyrë menjëherë duke bërë bllokimin e mjeteve dhe arrestimin e personave.
Po nga hetimet e kryera nga Specialistët për Hetimin e Trafiqeve të Paligjshme në D.V.P.Lezhë, dyshohet se mjeti lundrues Gomone është i trafikuar nga Italia për në Shqipëri nga 3 prej të arrestuarve.
Të arrestuarit
Eltion Isufaj , 29 vjeç, banues në Vlorë për veprën penale, “Kontrabandë me mallra që paguhet akcizë” “Trafikim i mjeteve motorike”
Nertil Shehu, 26 vjeç, banues në Vlorë, për veprat penale “Trafikim i mjeteve motorrike” “Kontrabandë me mallra që paguhet akcizë ” “Kalim i paligjshëm i kufirit” “Fallsifikim monedhash”. (Nga kontrolli fizik i ushtruar nga Policia, Nertilit i janë gjetur në xhep 100 dollarë të dyshuar të falsifikuar).
Eduart Musia, 30 vjeç, banues në Vlorë, për veprat penale “Trafikim i mjeteve motorike” “Kontrabandë me mallra që paguhet akcizë” Kalim i paligjshëm i kufirit”.
Arbër Bregu, 27 vjeç, banues në Tiranë, për veprën penale “Kontrabandë me mallra që paguhet akcizë”. /tesheshi.com/
