Nga Blendi Gashi
Misioni i Bashkimit Evropian për sundimin e rendit dhe ligjit në Kosovë, (EULEX) dy muaj para se t’i skadojë mandati, ka ndërmarrë një aksion të madh në bashkëpunim me policinë e Kosovës për arrestimin e grupit kriminal të përbërë prej 51 vetave, në krye me Azem Sylën, të cilët dyshohen për përvetësim të pronave private e publike në vlerë prej 30 milion eurosh.
Por EULEX-i gjatë bastisjeve që realizoi dje, në nuk arriti të kap ligjvënësin kosovarë pasi nuk e gjeti as në shtëpinë e tij në Kishnarekë të Drenasit por as në Prishtinë. Deputeti Syla, ndërkaq përmes një letre ka thënë se ai nuk ka ikur siç u raportua në media dhe se ka kontaktuar me organet kompetente dhe është i gatshëm të bashkëpunojë.
Megjithkëtë, ai vazhdon të jetë në arrati dhe nuk dihet vendodhja e tij dhe as kur do të kthehet në Kosovë, edhe pse raportohet se një gjë e tillë do të ndodh sot.
Por, shtrohet pyetja se a është aksioni i djeshëm i EULEX-it një shou i radhës medial me qëllim që t’i vazhdohet mandati, apo sinjal që politikanët e profilit të dyshuar për korrupsion do të përballen me drejtësinë?!
Një gjë të tillë padyshim se do ta dëshmoj koha dhe brenda dy muajsh do të mësohet nëse EULEX do të vazhdoj qëndrimin në Kosovë apo jo.
Pavarësisht kësaj, ky mision ka marrë kritika të vazhdueshme nga analistë dhe ekspert sigurie duke thënë se ka dështuar të bëj punën për çfarë është thirrur , pra të hetojë “peshqit e mëdhenj”, për më tepër njerëz të EULEX-it janë përfshirë në skandale të shumta.
EULEX-i nuk ka bërë asgjë serioze
Deputeti i LDK-së, Adem Salihaj, thotë se shpreson se këtë herë EULEX-i nuk po bën spektakël, sikur herave të tjera, duke bërë arrestime spektakulare t dhe pastaj liron personat e dyshuar si të pafajshëm.
“EULEX-i deri tash nuk ka bërë asgjë serioze. Shpejt do ta shohim se a ka ndryshuar diçka te ky mision. Nuk e di çka të dal në fund të gjithë kësaj,por kjo listë e përzier serbe e shqiptarë, policë të MUP-it serb e komandanti i shtabit të UÇK-së, është ajo që të ngjallë neveri të jashtëzakonshme. E gjithë ajo që kam thënë se këto janë struktura kriminale dhe eskadrone të vrasjeve, tash po konfirmohet”, ka thënë Salihaj, për tesheshi.com.
Presion i EULEX-it ndaj institucioneve vendore për t’ia zgjatur mandatin
Ehat Miftaraj, nga Instituti i Kosovës për Drejtës (IKD), thotë se përkrah fuqishëm organet e ndjekjës në luftimin e krimit të organizuar dhe korrupsionit.
Sipas tij, fakti se nga dhjetëra persona të dyshuar lidhur me rastin e pronave, u arrestuan dje vetëm 6 persona prej 51 të dyshuarve, tregon seriozitetin e EULEX-it. 
“Sikurse, spektakle të tilla nuk kanë munguar as në të kaluarën, por se në fund pothuajse të gjitha kanë përfunduar me hudhje të aktakuzave apo me dënime qesharake. Vetë kontesti i kohës kur EULEX-i ka filluar me këtë rast, poashtu ngjallë dyshime nëse ky mision me të vërtetë ka për qëllim ushtrimin e kompetencave të tij, apo më shumë është si një presion ndaj institucioneve vendore për të zgjatur mandatin e këtij misioni”, thotë Miftaraj, për tesheshi.com.
Ai më tej shprehet se EULEX-i gjatë veprimit të tij tetë vjeçarë në Kosovë nuk ka arritur të kryejë misionin e tij në raport me pritjet e qytetarëve të Kosovës dhe vet Bashkimit Evropian si financuesi më i madh i këtij misioni.
Ndërsa, Tomë Gashi, avokat i Azem Sylës ka thënë se është e çuditshme se si EULEX-i po hap raste të reja kur dihet se më pak se dy muaj i kanë mbetur deri në përfundimin e madantit.
“Është e pamundur që të përfundojnë hetimet gjatë kësaj kohe. Unë jam kundër vazhdimit të mandatit të këtij misioni”, ka deklaruar Gashi.
Skenare të drejtësisë selektive
Njohësi i çëshjeve politike Haki Abazi, vlerëson se po përdoren skenare të drejtësisë selektive, me ç’rast ka shtruar pyetjen se mos vallë personat që po arrestohen, po arrestohen për t’u mbrojtur.
“Çka po ndodhë, a po arrestohen për t’i mbrojtur? A po intereferohet me drejtësinë duke orkestruar skenare të drejtësisë selektive. Çka po ndodhë, ku po shkon ky vend përveç errësirës që nuk po shihet nga terri???”, ka shkruar në Facebook Abazi.
Kurse, Tahir Rrecaj, avokat i Nuhi Ukës, ky i fundit i arrestuar gjatë aksionit të djeshëm, ka deklaruar se bastisjet dhe arrestimet mund të jenë bërë për t’i rënë në sy Bashkimit Evropian për punën e vizave. Sipas tij, arrestimet mund të jenë bërë vetëm për spektakël mediatik sa për të thënë që Kosova po punon në luftën kundër korrupsionit. /tesheshi.com/
