Polica e Kosovës konfirmoi se një aksion i gjerë policor është duke u zhvilluar nga orët e para të mëngjesit në territorin e Kosovës, me fokus kryesisht Prishtinën, gjatë të cilit po kontrollohen një sërë banesash dhe pronash private.
“Mund të konfirmojmë se, sot është duke u realizuar një operacion policor i përbashkët në mes të Policisë së Kosovës dhe EULEX-it. Ky operacion policor udhëhiqet nga Prokuroria Speciale e Kosovës”, thuhet në një njoftim të policisë.
Zyrtarisht, nuk ka detaje për aksionin policor, por mediat në Prishtinë flasin për kontrolle edhe në disa prona private të zyrtarëve publikë. Thuhet se personat që po u kontrollohen pronat kanë kryer veprime të jashtëligjshme, si tjetërsim të pronës publike.
Jozyrtarisht thuhet se priten edhe arrestime. /tesheshi.com/
