Ilir Meta ka thirrur me urgjencë krerët e institucioneve të pavarura dhe ka përdorur “njeriun e njw mijë mistereve”, Spartak Brahon, alias “Baba Takun”, për të akuzuar shefin e SHISH-it, Visho Ajazi Lika se po “përgjohen krerë të lartë të shtetit shqiptar”.
Duke perifrazuar Pallatin 176: “S’mund të ishte kjo frazë në përgjithësi”, se siç tha Sandër Mafishja duke iu drejtuar Irenës së zyrës: “përgjithësi në zyrën tonë? Vetëm unë e ti jemi këtu!”
Por çfarë ka ndodhur që nuk u sqarua dje në takimin e gjerë të Ilir Metës me Kryeprokurorin dhe kryespiunin shqiptar?!
Alarmi ka rënë pas ardhjes në Tiranë të një grupi të DEA-s amerikane të cilët po ndjekin të ashtuquajturën çështje “Balili”.
Që është edhe rasti më i mistershëm i kësaj historie, e cila përfshin një superhetim ndërkombëtar për trafikun e drogës.
Ish-zyrtari i LSI-së në Delvinë sapo ka lëshuar një intervistë nëpërmjet avokatit në median greke, e cila ka shtuar edhe më shumë misterin.
Në këtë intervistë bëhet e ditur se autoritetet helene kanë lëshuar një urdhër-arrest për Klement Balilin, por kjo shkresë nuk është shpërndarë nga Interpoli dhe nuk ka mbërritur në Prokurorinë shqiptare.
Ndërkohë ekipi i DEA-s është shpërndarë në vëzhgimin në terren të një territori që përfshin Tiranën, Durrësin dhe zonën e Gjirit të Lalzit.
Ka disa ditë që ky rikonjicion i agjentëve amerikanë ka tronditur strukturat e larta të pushtetit në Shqipëri, por ka qenë e paditur se kush është objekti i përgjimit apo i vëzhgimit i oficerëve të agjencisë së SHBA për luftën ndaj narkotikëve.
Deklarata e “Baba Takut” ka sinjalizuar diçka në këtë alarm dhe mësohet se bëhet fjalë për zyrtarë të lartë të pushtetit të zgjedhur nga LSI.
Një burim i rëndësishëm i agjencive ligj-zbatuese bëri të ditur se aksioni i DEA-s po bëhet në bashkëpunim të ngushtë me policinë e shtetit dhe ka si target bashkëpunëtorët e Balilit, apo thënë më qartë, rrjetit të tij të trafikut të drogës dhe përdorimit të parave në politikë.
Siç mësohet, aksioni i DEA-s në kryeqytetin shqiptar është “final” dhe ka si objektiv që në rrjetë të fusë ndonjë “peshk të madh” pasi grepi siç duket është ushqyer me karremat e furnizuar nga Balili, sipas të gjitha gjasave një i penduar i amerikanëve.
Dy superoperacione ndërkombëtare janë kryer në rrjetin që Ballili ka pasur lidhje: një në disa qytete e uropiane, ku në rrjetë ranë dy partnerë të fuqishëm të Balilit në Belgjikë, si dhe një tjetër në ujrat italane ku u kap një sasi e madhe me 2 ton hashash, pjesë e kësaj organizate.
Jo më kot, greku që drejton Ministrinë e Brendshme të BE-së, Avramopulos, edhe pse vend i tij nuk e ka hiç me sy të mirë qeverinë shqiptare, i përmendi Tahirit si sukses bashkëpunimin me policinë europiane për kapjen e baronëve shqiptarë të drogës(të cilën tesheshi.com e paralajmëroi muaj më parë por edhe e botoi i pari pas përfundimit).
Ndërkaq, në Hagë ku ndodhet qendra e Europolit është thirrur Drejtori i Policisë së Shtetit, Haki Çako, për të organizuar një super-aksion të radhës në Shqipëri, Ballkan dhe vendet e BE-së.
Ky është edhe qëllimi i ardhjes së bërthamës superspeciale të DEA-s amerikane, “krisma”e së cilës pritet të shpërthejë shpejt dhe të lëndojë shumë lart. Por gjithçka deri atëherë mbetet një mister. Deri tani kanë dalë vetëm mesazhe të koduara për të tronditur pak mjedisin kriminal që “objekti të dalë nga strofkulla”… /tesheshi.com/
