Dhjetë ditët e para të aksionit kundër informalitetit kanë lënë mëse të kënaqura autoritetet, të cilat bënë edhe një bilanc të arritjeve. Drejtoresha e Përgjithshme e Tatimeve Brisida Shehaj në një dalje për mediat tha se në këto ditë janë kryer mbi 13 mijë kontrolle në të gjithë vendin, ku në 1968 subjekte janë gjetur shkelje.
Shifrat flasin, sipas saj, se ka një rritje të xhiros me 66 milionë, e një rritje me 50 për qind të lëshimit të kuponave tatimorë.
Kjo rritje e përkthyer në numra përbën 5.6 milionë kupona tatimorë të lëshuar më shumë nga bizneset vetëm për 10 ditë.
Të njëjtat suksese raportoi edhe kreu i Inspektoratit të Punës, Dritan Ylli i cili tha se kontrollet kanë zënë “mat” 325 punonjës në të zezë, që tashmë, sipas tij, janë përfshirë në skemën e sigurimeve. 186 subjekte janë bërë objekt kontrolli, e në disa prej tyre, edhe pse me licencë të rregullt, ishin të punësuar njerëz pa sigurime.
Aksioni kombëtar kundër informalitetit angazhoi në këtë fillim shtatori autoritetet e tatimeve e sigurimeve, ndërsa kryeministri Edi Rama apeloi disa herë bizneset të lëshojnë kupona tatimorë, ndërsa qytetarët të kontribuojnë me dëshminë e tyre. /tesheshi.com/
