Nga Mensur Krasniqi
Në horizontin e një krize akoma më të thellë në Maqedoni, sidomos pas një amniste deri dhe provokuese të presidentit Ivanov që ka çuar në faljen e një sërë politikanësh të përzjerë në afera, duket se ndërkombëtarët po bëjnë një tjetër provë për t’i dhënë drejtim situatës. Tashmë, kësaj krize i është shtuar dhe fakti se zgjedhjet e 5 qershorit, gati po bëhen të pamundura për t’u mbajtur, edhe pse u shtynë me një marrëveshje politike, nga data 24 prill që i caktoi pushteti
Për herë të parë pas arritjes së tij në Shkup, përfaqësuesi special i Gjermanisë për Maqedoninë, Johan Hajndëll ka dhënë një deklaratë lidhur me misionin e tij gjatë qëndrimit dyditor në kryeqytetin maqedon. Sipas tij, koha nuk premton për të qëndruar pasiv, andaj, siç tha ai, “nevojitet një përpjekje e përbashkët e partive politike në bashkëpunim me përfaqësuesit ndërkombëtar mbi zbatimin e reformave të rekomanduara nga BE, në mënyrë që të tejkalohet kriza politike në vend.”
“Kam ardhur këtu të njihem me situatën dhe të dëgjoj. Bëhet fjalë për atë që procesi i iniciuar nga SHBA dhe BE të korr sukses. Detyrën time e shoh në përkrahje aktive në këto tentime. Zhvillimet ditëve të fundit tregojnë qartë se koha është e shkurtër, dhe tani nevojitet përpjekje e përbashkët nga të gjitha partitë politike që të zbatohen reformat e nevojshme dhe bindshëm të vazhdohet në rrugën e tyre”, ka thënë Johan Hajndëll.
Në agjendën e tij është dhe takimi me liderët e partive politike, nënshkruese të Marrëveshjes së Përzhinos, si dhe ambasadorin e SHBA-së dhe të tjerë sosh të vendeve të BE-së.
Por në njoftim nuk është paraparë nëse Hajndëll planifikon të takohet edhe me presidentin Ivanov, një prej katalizatorëve të krizës me amnistinë e tij të shumëkundërshtuar, si nga opozita politike e si nga shoqëria civile.
Mbi situatën politike në Maqedoni, komentet e tyre gjatë ditës së sotme i kanë dhënë edhe euroambasadori Aivo Orav, si dhe ai britanik, Çarls Gereth.
Orav ka shprehur keqardhje për reformat që, siç tha ai, janë dashur të bëhen dhe që nuk janë bërë deri në fund, e sidomos pastrimin e listave zgjedhore, për shkak të të cilave shumica e partive politike kanë thënë se nuk do të marrin pjesë në zgjedhjet e 5 qershorit.
“Kemi vërejtur se shumë parti politike nuk do të marrin pjesë në zgjedhje, se lista zgjedhore nuk është pastruar. Me shumë vështirësi po zbatohet reforma në mediat, dhe se problem serioz është vendimi falje nga ana e presidentit Ivanov”, ka deklaruar Orav, duke e cekur kështu dhe këtë pikë të ndjeshme.
Nga ana tjetër, ambasadori britanik Çarls Gereth, theksoi se është e nevojshme të arrihet marrëveshje urgjente për të dalë nga siç tha ai, qorrsokaku i tanishëm. Dhe në këtë kuadër, ai përmendi tërheqjen që duhej të bënte presidenti Ivanov nga vendimi për amnisti ndaj disa figurave politike të lidhura me pushtetin. “Më e rëndësishme në çdo shtet është sundimi i së drejtës dhe barazia e të gjithë qytetarëve para ligjit”, ka theksuar Gareth.
Ditëve në vijim, pritet të shihet se sa do të shtohet doza e presionit ndërkombëtar ndaj autoriteteve të Shkupit, e veçanërisht presidentit Ivanov. Ndërkohë që pritet të shihet nëse ky i fundit do tregohet luajal, apo do vijojë në këmbëngulësinë e tij pa pyetur për ndërkombëtarët, siç ka bërë gjer më sot me vendimin për aministi. /tesheshi.com/
