Forca policore të komisariatit të Gjirokastrës kanë mësyrë sot në xhaminë e vetme të këtij qyteti duke prangosur në publik dhe pa asnjë shpjegim besimtarë të atyshëm. Janë katër persona, përfshirë dhe muezinin e xhamisë, të cilët janë shoqëruar në komisariat, por me pranga në duar, janë mbajtur një orë dhe më pas janë liruar.
Denoncimi është bërë nga drejtues të xhamisë të cilët thonë se janë ndjerë të fyer nga kjo sjellje e autoriteteve policore, aq më tepër që prangosjet kanë ndodhur në ditë xhumaje dhe pa asnjë lloj etike ushtrimin e detyrës.
Në xhaminë e Gjirokastrës, thonë ata, ka vetëm besimtarë që njihen në qytet dhe që nuk kanë asnjë lidhje me Lazaratin.
Por dhe po të ishte fjala për xhaminë e Lazaratit, edhe atje situatat janë aq të qarta, sa nuk ka pse shteti të sillet si bazhibozuk duke bërë show të panevojshëm.
Ditë më parë, kreu i Policisë së Shtetit Haki Çako, thirri në zyrën e tij dy drejtues fetarë me autoritet në zonë, për t`ju kërkuar ndihmesë e bashkëpunim në kryerjen e detyrës nga ana e policisë për rivendosjen e ligjit në zonë. Dy hoxhallarët kanë shprehur gadishmëri maksimale dhe mbështetje të plotë për strukturat ligjvënësve për çdo rast.
Por drejtues të xhamisë së Gjirokastrës, e quajnë këtë një lloj “pabesie” nga ana e autoriteteve policore, që pa asnjë shkak, pa asnjë komunikim paraprak, pas asnjë vetëpërmbajtje etike – duke qenë se mësyjnë në objekte kulti – ushtrojnë një terror psikologjik krejt të panevojshëm, duke nëpërkëmbur poshtërsisht dinjitetin e qytetarëve, qartazi pa asnjë problem me ligjin. /tesheshi.com/
