Sekretarja për Marrëdhëniet me Publikun në PD, Grida Duma ishte sot në vendin e ngjarjes në Kavajë ku humbën jetën dy fëmijë nga një aksident për shkak asaj që partia opozitare e quajti si “interesa të njerëzve të lidhur me pushtetin”.
“Ngjarja ndodhi për shkak të interesave klienteliste të pushtetit. Ndërsa qindra qytetarë përfundojnë burgjeve për një suva, për një çati, për një mur shtëpie në pronë të vetën, ky shtet, kjo qeveri, ajo ministri, ai autoritet rrugor, prej dy vitesh nuk zbatojnë një vendim gjykate për të vendosur mbrojtëset e rrugëve”, – tha Duma.
Ajo e cilësoi ngjarjen një krim shtetëror pasi skandali është edhe me i rëndë. Sipas saj, firma që marrë fondet publike për sigurinë rrugore është e njëjta që ka në pronësi edhe karburantin, për shkak të së cilit, sipas PD-së, prej dy vitesh nuk zbatohet një vendim gjykate për të vendosur mbrojtëset e rrugëve.
“Vajzat, fëmijët që humbën jetën, ishin nisur me nënën e tyre për të takuar të atin që ky pushtet e plasi në burg për një çati që po ndërtonte pa leje. Nga ana tjetër krimi shtetëror shkon dhe ulet këmbëkryq mbi vendimet e gjykatës. Është ky krim që na shkel dinjitetin. Është ky krim që na merr jetë”, tha Duma. /tesheshi.com/
