Një aksident i pazakontë, i rëndë por dhe spektakolar në dukje, gjithsesi pa bilanc fatal, ndodhi mbrëmjen e së premtes në Tiranë. Një urbani i linjës së Unazës u përplas me një mjet dhe të dy kanë përfunduar në Lanë, mjeti i madh mbi atë të voglin.
Autobusi kësisoj, ka përfunduar në pozicionin e një ure, me kulmet mbi skarpat, ndërsa përposhtë ka patur automjetin me të cilin është përplasur.
Njoftimi policor thotë: “Më datë 29.04.2022, rreth orës 20:10, në afërsi të Kinema Agimi, një autobus është përplasur me një automjet, dhe si pasojë drejtuesi i autobusit ka humbur kontrollin mbi drejtimin e tij, dhe ka rënë në Lumin Lana.
Si pasojë e aksidentit janë dëmtuar dhe janë paraqitur në spital dhe ndodhen jashtë rrezikut për jetën dy pasagjerët e automjetit që u përplas me autobusin. Grupi hetimor ndodhet në vendngjarje dhe po punon për sqarimin e rrethanave të aksidentit”. /tesheshi.com/
