Pamjet shokuese të asaj gruaje, nënë e dy fëmijëve, e cila shtypet në mënyrën më makabre nga një automjet, në timonin e së cilit me gjasë është ndodhur një delikuent, po ashtu me gjasë nën efekte droge apo alkoli, pasi siç është vënë re, ai i ka patur të gjithë mundësitë për ta evituar shtypjen pas përplasjes me parakolp, ka bërë që e gjithë vëmendja të përqëndrohet tek ajo skenë, ndërsa ca të tjerë të lihen anash.
Është fjala për automjete që vijojnë rrugën e nuk ndalen, edhe pse afër rrotave të tyre dergjet nën grahmat e fundit një grua e saposhtypur. Ato thjesht devijojnë paksa sa për të mos e prekur trupin e të gjorës, ngjashëm si në rastin me ndonjë qen të shtypur, ku drejtuesit në timon, jo aq për humanitet, shmangen nga meraku për automjetin.
Mjaft pra të shihen pajmet se si asnjë automjet nuk ndalon në çastin kur rrotat e Mercedezit me atë horrin brenda përshkojnë trupin e gruas. Kjo, derisa nuk ka asnjë të dhënë që ata të jenë vënë në ndjekje të horrit pas asaj skenë që u kanë parë sytë.
Dhe ky është një tjetër aspekt i dhimbshëm i atij aksidenti tragjik, që denoncon dhe indiferencën tonë, individualitetin e frikshëm, ikjen nga përgjegjësitë qytetare, prej së cilave lindin e veprojnë dhe mostra të tilla si ai që i morri jetën nënës së dy fëmijëve, duke u shkaktuar këtyre të fundit dhe një traumë e dramë që do i shoqërojë sa të jetojnë në këtë botë.
Fjala vjen, a mund të ndodh që, dikush që sheh një automjet të ecë me shpejtësi në një rrugë urbane apo ndërurbane, ta denoncojë atë në polici me anë të kontaktit telefonik, me të vetmin mision qytetar që të shmangë një të keqe? Gati e pamundur.
Dhe së këndejmi nis të gatuhet terreni i një drame, së cilës ne vetëm i shohim epilogun me personashin që e finalizon atë, ndërsa në prolog jemi dhe ne autorë të saj, me indiferencën tonë, me vizionin e të jetuarit deri tek maja e hundës e aspak më tej. /tesheshi.com/
