Katër shqiptarë, nga ata që punonin në Gjermani në emër të “një jete më të mirë”, patën tjetër destin këto ditë, përveç njërit që ende lufton me vdekjen në gjendje kome.
Tre kolegët e tij në punë tashmë nuk jetojnë më.
Shembja e një skele në një kantier ndërtimi ku ata punonin qe fatale.
Albert Zorba nga Elbasani, Rruzhdi Hoxha nga Kukësi dhe Astrit Gjeka nga Dibra, janë jetëhumburit tragjikisht në ngjarjen e rëndë në Hamburg mëngjesin e të hënës, ndërsa Alfred Visha ndodhet në gjendje kome.
Ata ishin të pajisur me dokumente pune bullgare false dhe një gjë e tillë e ka bërë më të vështirë identifikimin e tyre nga autoritetet gjermane. Ndaj dhe u raportua fillimisht për punëtorë bullgarë të vdekur në aksident.
Ata ishin të kontraktuar si punonjës në një kompani në pronësi të një shqiptari nga Kovosa, i cili pas ngjarjes tragjike është zhdukur.
Ngjarja ndodhi mëngjesin e së hënës teksa shqiptarët po punonin në katin e tetë të një pallati në zonën e HafenCity. /tesheshi.com/
