Prokuroria ka ngritur dy akuza ndaj deputetit të PDIU-së, Aqif Rakipi, lidhur me aksidentin e ndodhur mëngjesin e së shtunës në aksin Vorë-Tiranë, pranë kthesës së Kamzës, ku humbi jetën shtetasi Sait Sorra, 54 vjeç.
Akuzat e ngritura ndaj deputetit që po hetohet në gjendje të lirë, janë “shkelje e rregullave të qarkullimit rrugor” dhe “largim nga vendi i aksidentit”
Kjo akuzë e fundit mësohet se është “shtuar” e formuluar nga prokuroria pas analizimit të provave e rrethanave të ngjarjes, edhe pse rezulton se policia nuk e ka referuar çështjen për një vepër të tillë.
“Më datë 12.08.2017, u referuan materialet në Prokurorinë e Rrethit Gjyqësor, Tiranë për shtetasin Aqif Rakipi, 53 vjeç, banues në Tiranë, pasi në autostradën Tiranë-Durrës, duke drejtuar mjetin tip ‘Benz’, ka aksidentuar për vdekje këmbësorin Sait Sorra, 54 vjeç, banues në fshatin Kashar. Neni 290 i Kodit Penal”, thuhet në komunikatën zyrtare të policisë, publikuar ditën e djeshme.
Ky nen në Kodin Penal parashikon veprën e “shkeljes së rregullave të qarkullimit rrugor”. Sipas paragrafit të dytë të këtij neni, “shkelja e rregullave të qarkullimit rrugor, kur ka shkaktuar vdekjen e një personi, dënohet me burgim nga dy deri në dhjetë vjet”, shkruan Panorama.
Por, deputeti i PDIU, po hetohet edhe për akuzën e largimit nga vendi i aksidentit, vepër penale që parashikohet nga neni 273 i Kodit Penal ku thuhet: largimi nga vendi i aksidentit, i drejtuesit të automjetit apo të çdo mjeti të motorizuar, për t’u shmangur nga përgjegjësia penale, civile apo administrative, përbën kundërvajtje penale dhe dënohet me gjobë ose me burgim deri në një vit.
Policia tha se Rakipi është paraqitur në Polici në orën 04:51, bashkë me automjetin tip “Mercedez Benz S-Class”, me targë AA 002 CY, që ishte i dëmtuar në pjesën e përparme. Ai ka deklaruar se kishte përplasur një këmbësor me makinë në autostradë dhe për këtë arsye po dorëzohej.
Aksidenti është kthyer në një debat në distancë mes PD dhe PDIU-së. Kjo e fundit akuzon demokratët se kanë marrë rolin e hienave, ndërsa partia më e madhe e opozitës kërkoi nisjen e proçedurës për heqjen e imunitetit për deputeti Rakipi dhe një hetim të plotë nga prokuroria. /tesheshi.com/
