Sipas Raportit të Gjendjes Globale mbi Sigurinë Rrugore për vitin 2015, të publikuar të hënën në kujdesin e Organizatës Botërore të Shëndetësisë, çdo vit vdesin në botë nga aksidentet rrugore 1.25 milionë njerëz.
Afrika vihet në pah si kontinenti me rrugët më të rrezikshme, kurse vdekjet janë më të pranishme te njerëzit e varfër në vendet e varfra.
Gjithsesi, ky raport i Organizatës Botërore të Shëndetësisë përcjell nota optimiste, kur thekson se situata po përmirësohet, ndërsa numri i vdekjeve po qëndron në vend edhe pse është vazhdimisht në rritje numri i automjeteve.
Rreth 90 për qind e vdekjeve në nivel global nga trafiku rrugor ndodhin në vendet me të ardhura të ulëta apo të mesme. Përqindja më e lartë e vdekjeve haset në Afrikë, me 26.6 vdekje të përvitshme nga trafiku për 100.000 banorë, ndërsa Europa e ka këtë shifër 9.3 për 100.000 banorë, që është më e ulëta.
Këmbësorët zënë 22 për qind të numrit të përgjithshëm të të aksidentuarve për vdekje, e 23 për qind e zënë ngarësit e motorave.
Raporti tregon gjithashtu se siguria në rrugë është përmirësuar posaçërisht në ato vende që i kanë rregulluar me ligje pesë faktorë me rrezik: shpejtësinë, vozitjen i pirë, përdorimin e kaskave, rripin e sigurimit, dhe ulëset për fëmijë.
Organizata Botërore e Shëndetësisë rekomandon që shpejtësia maksimale në zonat urbane nuk duhet t’i kalojë 50 kilometrat në orë. Ky rekomandim respektohet vetëm nga 47 vende. /tesheshi.com/
