Gjatë një prononcimi për Top Channel, Skënder Ismaili, shef i sigurisë rrugore në Drejtorinë e Policisë Tiranë, tha se shkak i aksidenteve të shumtaqë ndodhin çdo sezon veror në Shqipëri, janë dhe emigrantët, të cilët, sipas tij nuk respektojnë rregullat e qarkullimit. Madje, zyrtari policor shqiptar tha se shume prej tyre, duke aluduar në shqiptarë të Kosovës apo trojeve të tjera, ankohen nga ndëshkimet me pretendimin se janë “në vendin e tyre”
“Ka një moszbatim të normave të sjelljes nga këta përdorues të rrugës. Mund të themi se ka një liri veprimi, edhe pse rregullat janë njësoj si në vendet e tjera, ashtu dhe në Republikën e Shqipërisë. Jo vetëm shtetasit kosovarë, por edhe shqiptarët e tjerë që jetojnë diku jashtë dhe kthehen në vendin e tyre janë shumë të çrregullt në drejtimin e mjeteve. Shumë nga ata janë ndëshkuar, shumë janë këshilluar, shumë debatojnë me punonjësit e policisë”, tha Ismaili.
Ai, por dhe ekspertë, apelojnë që drejtuesit në timon të shmangin udhëtimet e gjata dhe përdorimin e celularëve.
Sipas statistikave, aksidentet janë shtuar me 8% krahasuar me të njëjtën periudhë të një viti më parë. Ndërsa duke iu referuar atyre të masave, vetëm gjatë fundjavës së kaluar policia ka vendosur mbi 500 mijë gjoba, si dhe ka arrestuar 20 persona. /tesheshi.com/
