Dy persona kanë humbur jetën dhe 14 të tjerë janë plagosur si rezultat i 4 aksidenteve që kanë ndodhur ditën e sotme.
Ndoshta reshjet e shiut që përfshinë territorin e vendit, në disa zona edhe breshër, kanë ndikuar ndjeshëm në aksidentet e ndodhur për shkak të rrëshqitjes së mjeteve në rrugë.
Aksidentet kanë ndodhur në Elbasan, Rrogozhinë, Përrenjas e Librazhd.
Në zonën e Qafë Thanës një makinë ka dalë nga rruga për shkak të shpejtësisë dhe terrenit të rrëshqitshëm, e për pasojë ka humbur jetën drejtuesi i automjetit, i cili mësohet se ka qenë një shtetas maqedonas. Në makinë me të ishin dhe 4 persona të tjerë të cilët kanë mbetur të plagosur por pa pasoja serioze për shëndetin e tyre.
Në rreth rrotullimin e Rrogozhinës është përplasur në orët e mesditës një automjet tip Fiat me një kamion, ku për pasojë ka humbur jetën drejtuesi i mjetit veturë, 25 vjeç.
Aksidenti i tretë është regjistruar në aksin Librazhd-Përrenjas ku janë përplasur dy furgonë me pasagjerë. Tre pasagjerë u plagosën, por fatmirësisht nuk ka komplikacione dhe këta të fundit ndodhen jashtë rrezikut për jetën. Aksidenti ka ndodhur për shkak të shpejtësisë dhe shiut.
Fatkeqësisht në aksidentin e ndodhur në Xibrakë ku janë plagosur 7 persona, një 12 vjeçare ndodhet në gjëndje kritike për jetën. Në këtë zonë u përplasën dy automjete, njëri i tipit Benz që drejtohej nga D.D. 37 vjeç banues në Xhafzotaj në Durrës si dhe mjeti tip ‘Toyota’ që drejtohej nga B.B. 50 vjeç banues në Tiranë.
12 vjeçarja që ndodhet në gjëndje të rëndë ishte pasagjere në makinën Toyota që drejtohej nga babai i saj.
Përveç dy drejtuesve të mjeteve, të plagosur janë S.B. 23 vjeçe banuese në Tiranë, e cila ishte pasagjere në mjetin tip Benz. /tesheshi.com/
